Read Kalanga Jobe 29 Bible Online

Jobe 29 - Kalanga bible

Jobe 29

¹Jobe kadwilila kakale nge ndebeleko iye eti,

²“Ungati ndingabe ndinga tjandakabe ndili itjo mimwedzi yakapinda, kunga mu mazhuba iyawaje Ndzimu ugala wakandilisa,

³pawakabe uthama kuti luvone gwawo gupenye pezhugwi kwe nsholo wangu, nge tjedza tjawo ndipalame zhalima,

⁴se mazhuba andakabe nditjakasima, kwakabe buzwalani gwangu ne Ndzimu gwakakombolela nzi wangu.

⁵Masimbawose bakabe banami, bana bangu bakandipoteleka.

⁶Matshambo angu ndakabe ndiyazhodza lubomba, mabgwe enditebukila mafuta e mitoba.

⁷Ndakabe nditi andiyenda ku nkoba we nzi nkulu, nditi nditola tjigalo tjangu pa tjibata,

⁸bazhuzha bakabe betsheduka abendibona, sholotjena dzikama nge makumbo,

⁹makombgwa akabe emisa kulebeleka, bebiga maboko pa milomo yabo,

¹⁰mahwi e banokudziwa akabe eti hwu, ndimi dzabo dzakabe dzinamatilana ne mbgwasha dzabo.

¹¹“Zebe yakabe endihwa ikandikombolela, zhisho lakabe lindibona likapa butendeki nge kwangu.

¹²Ngoti ndakabhatsha nshayi wakabe ekumbila bhatsho, ne siyangwa yakabe isina unoibhatsha.

¹³Ndakakombolegwa ndi iwoyu wakabe abepejo ngokufa, athama kuti tjilikadzi ipembele nge kushatha.

¹⁴Ndakafuka ndulamo se tjiambalo tjangu, kutambunuka kwangu kukanga hazu ne tjiala ikandiambadza se hazu ne tjiala.

¹⁵Ndakabe mesho ku bhofu, ndikabe makumbo ku tjilema tje makumbo.

¹⁶Ndakabe tate ku nshayi, amilila wandisingazibe mu lubazhe.

¹⁷Ndakavuna meno e mbiimbi, adzamula wakabe awila mu meno awe.

¹⁸Ndakakumbula nditi, ‘Ndowofila mu shaka langu, ndowowatsha mazhuba angu akanga nsetje.

¹⁹Midzi yangu inowala ikanoti ku vula, ne thabi dzangu dzowigwa ne khawa.

²⁰Gudzo langu lidzwa nsi ne nsi mundili, ne dati langu logala lilidzwa koga mu luboko gwangu.’

²¹“Bathu bakabe benditeedza nge kugalabgwe, bakabe benyalala beti hwu, behwa gumbuludzo langu.

²²Shule kwe ndalebeleka bakabe basingatjalebe tjimwe, matama angu akabe edothekela mu zebe dzabo zubuyanana.

²³Bakabe bendilindila se bakalinda vula, beashama se nthu una nyota mu nsi we nyawuko.

²⁴Ndakabe ndibamwemwetelela apa basina kugalabgwe, penya kwe tjiso tjangu kwakabe kubasimisa.

²⁵Ndakashalula zila yabo ngono agala sa she wabo, ndakagala sa mambo pakati kwe babhayani babe, sa iye unonyaladza banolila.