Read Kalanga Jobe 3 Bible Online

Jobe 3 - Kalanga bible

Jobe 3

¹Shule kwa ikoku, Jobe kazhula nlomo uwe ngono kalonga bhiso zhuba laakazwagwa nalo.

²Jobe kalebeleka eti,

³“Ungati zhuba landakazwagwa nalo lingaloba, kose ne busiku gwakayi, ‘Mwana we mbisana wazwisengwa!’

⁴Thamani kuti zhuba ilelo libe zhalima, Dzene Ndzimu upezhugwi ungakangang'wa nge kwalo, dzene kukasibe ne tjedza tjinopenya mulili.

⁵Dzene zhalima ne dutshi zwingati zwi mulili. Dzene makole kalikwitidza. Dzene zhalima lingakulila tjedza tjalo.

⁶Busiku igoguje ngagukuligwe nge zhalima! Ngalisibaligwe mu mazhuba e gole kene kuli kugubalila mu mimwedzi.

⁷Dzene busiku igoguje gukabe balumbila, dzene kukasihwike nsindo we mpululu muguli.

⁸Budzani ibabo banolonga bhiso mazhuba balonge bhiso zhuba ilelo, ibabo banoziba kumusa zhithu le gungwa linoyi Livatani.[3]

⁹Thamani kuti nyenyedzi ye masasi itundubale, dzene gungalindila suli tjedza tje zhuba ngagukong'we ngobona mazazi ekutanga e zhuba mangwanana.

¹⁰Ngobe aguzozhalila mikoba ye tjibumbilo tja mmeyangu, gukasumbikila mesho angu mang'oni.

¹¹“Ini ndisakafa nditjazwagwa koga, kene ndakatjinyikila mu tjibumbilo?

¹²Ini kwakabe ne zwidwi kundiamutjila kene? Ini kwabe ne mazhamu kundimwisa kene?

¹³Ngobe ngwenu ndingabe ndililele nge mbakiso zwangu, ndingabe ndililele ndakanyaluluka zwangu,

¹⁴ndina bomambo ne bakumbuludzi be shango, bakazwibakila magalo ngono ngwenu abe matongo,

¹⁵kene ndina bakololo be bushe bakabe bana golide, ibo bakabe bana ng'umba dzizhele siliva.

¹⁶Kene ini ndisakabiganyiwa se wazwagwa asingatjile kene? Se lushabana gusathu gukabona tjedza tje zhuba kene?

¹⁷Ikweno babi bamisa kudziyidzika, ikweno bakanyala bakanyaluluka.

¹⁸Basungwa bagele bose bakaliga makumbo, abatohwa hwi le nshingisi.

¹⁹Batukunu ne bakulu bayikweno, balanda bakasununguka muna botetshi babo.

²⁰“Ini tjedza tjipiwa umu kudziyidzika, ne butjilo gupiwa una meya dzakagwadzika kene?

²¹Ibabo banoyemula lufu ngono gusipo, ibo banogushaka kupinda fumwa yakasumbikika,

²²ibo banoshatha kwazo ha bebona gomba le lufu.

²³Ini butjilo gupiwa nthu we zila dzakasumbikala, iye wakabakiligwa bhakasa nge Ndzimu?

²⁴Ngoti shungu yangu yatjibe zojiwa zwangu, ndotshinda ngo gomela kwangu kunonga vula inowunga.

²⁵Ngoti tjandagala nditja tjandishingikalila, tjandagala nditja tjandiwila.

²⁶Andizo gadzikana, andina kunyaluluka, kuzhe kwe mang'oni koga.”