Read Kalanga Jobe 30 Bible Online

Jobe 30 - Kalanga bible

Jobe 30

¹“Koga ngwenu ndosekwa ne batjetjana mundili, ibo botate babo bandakabe ndilingila pasi, ndisingake abashanganya ne mbgwa dze pkhwizi dzangu.

²Naiko ndobuyigwa neni mu simba le maboko abo, ngoti simba labo lapela mubali.

³Bakapeleledziwa nge kusheta nenge zhala, bepupuna mu shango yakawomelela ye tjilambanyika.

⁴Betjela mazhani ana mwenyu mu matenjana bebesa nti unoyi ntshwayilo kuzwidziyisa.

⁵Banotatigwa kutjena pakati kwe bathu, banomimiligwa sekunomimiligwa mbava.

⁶Bakapelela begala mu phili dze mikukwana yakawoma, mu mimwina ye shango ne mu makuwu.

⁷Banomimila bali pakati kwe matenje, bezwikubunganya mu mibabashulo.

⁸Bana be zwilengwe! Bana be banolingigwa pasi, bakatatigwa kutjena mu shango belidzigwa tjimi.

⁹“Ngono ngwenu ndatjibe lumbo gwabo, anditobhuda pa milomo yabo.

¹⁰Banondishinyata, banomila kule kule nami, abatotja naiko kundithwila mate mu buso.

¹¹Ngoti Ndzimu wakatoba nshongonshongo wangu ndikawobama, bandishandukila, bakaposela tomo mbeli kwangu.

¹²Ku luboko gwangu gwe luji banolingigwa pasi banomilika bendinginilila, bebiga mapuzhu kuteya makumbo angu, banobaka makuma anotathila kundinginilila.

¹³Banokolomola zila yangu. Banobhudilila mukundikolomodza, akuna unobadziba.

¹⁴Banongina se ungati nkoba wakazhuka, banokomba bezha bekunguluka.

¹⁵Lutjo gwakandiambala, Gudzo langu latatigwa kutjena se phepo, kubhudilila kwangu kwapadza se makole.

¹⁶“Ngono ngwenu butjilo gwangu gobipila mbeli, mazhuba angu e kudziyidzika anondikulila.

¹⁷Busiku mafupa angu anopanda, panda kunondipanda akutoma.

¹⁸Nge masimba makulu zogwadza zotjinga tjiambalo tjangu, zondipomba se iphika tje tjiambalo tjangu.

¹⁹Wakandilashila mu dope, ndotjinga hwuluba ne nlota.

²⁰Ndolilila kumuli, koga amutondidabila, Ndoma mbeli kwenyu ngono amuna hanya nami.

²¹Makandishandukila kube nkukutu mundili, nge simba le luboko gwenyu mogwa nami.

²²Mondimilidzila mu phepo, munditathisa iyo, mondihwuhwunganya mu matutu.

²³Dumbu, ndoziba kuti mondiyisa ku lufu, ku ng'umba yakabigigwa bose banotjila.

²⁴“Dumbu, akuna ungamilidza luboko gugwe ali mu duluthulu le dongo, mu kudziyidzika kukwe elila ekumbila bhatsho kene.

²⁵Apa andizolilila ibabo bakamanikana kene? Andizohwila ngoni nshayi kene?

²⁶Koga ndakalindila bubuya, kukazha mbipo, ndikati ndakamilila tjedza kukazha zhalima.

²⁷Moyo wangu wakati tshi! Andizodzikama. Mazhuba e buyendasi anozha kundili.

²⁸Ndabe ntema koga kusi ngekutshwa ne zhuba, ndomilika mu gubungano ndililila bhatsho.

²⁹Ndatjibe hama ye phungubgwe, nkwinya we fukumudzi!

³⁰Ganda langu labe demadema, lokwakwanyuka, mafupa angu anopisa nge nthuto.

³¹Tjilidzo tjangu tje laya tjatjibe tje tjililo, ne lunyanga gwangu gwabe nlidzo kuna bamu tjililo.