Read Kalanga Jobe 31 Bible Online

Jobe 31 - Kalanga bible

Jobe 31

¹“Ndakathama tjidumano ne mesho angu, kuti asitongolinga mwanadi.

²Gobe langu labelowobeni kudwa pezhugwi ku Ndzimu kene, ne lukata gwangu kudwa kuna Masimbawose ba pezhugwi ini kene?

³Apa zwakabipa azwitowila babi kene? Apa tjiga ate tja ibabo banothama mbipo kene?

⁴Apa autobona zila dzangu kene? Apa autobala thambo imwe ne imwe yangu kene?

⁵“Ha kuli kuti ndakabe ndiyenda mu zila dze bupitipiti, makumbo angu akalibilidzila kunotjinya,

⁶ngandiyegwe mu tjiyelo tjakalulwama, kuti Ndzimu ubone kuti andina nlandu!

⁷Ha kuli kuti ndakatongo pambuka mu zila, ne mesho angu kasala shule yemula dzangu, kene kuna itoyi mu maboko angu,

⁸ha kwakajalo zwandakadzwala ngazwijiwe ne upoga, ne zwijo zwe nnda wangu zwisimugwe.

⁹“Ha moyo wangu wakatongokuzhugwa ne nkadzi, kene ndakatongolalila pa nkoba we mbakidzani wangu,

¹⁰ha kwakajalo, nkadzi wangu ngaakhwile mmwe nlume, kakale nlume upoga ngaawalilane naye!

¹¹Ngobe kuthama saikoku nlandu nkulu, nlandu wakafanila kuti ulobegwe shamu ne basumikilisi.

¹²Moto unolotesa kose ku Golomodzo, unowopisa kunoti ku midzi ya kose kwandakavuna.

¹³“Ha ndisakabe ne hanya kuteedza nlandalume wangu kene nlandakadzi wangu, beng'ong'ola nge kwangu,

¹⁴ndowothama tjini wali Ndzimu ha watjilingisana nami? Ha undilingisa matama ndowoudabila nditini kene?

¹⁵Apa ate iwo wakandibumba ukababumba bo kene? Apa ate iwo wakatibumba tose mu zwibumbilo zwa bomme bedu?

¹⁶“Apa ndakatongo nyima nshayi tjaakabe ekumbila, ndakatongo tobosa tjilikadzi kene?

¹⁷Apa ndakatongoja tjiwunga ndili ndoga, ndinyima siyangwa kene?

¹⁸Kudwa mu butjetjana gwangu ndakalela siyang'wa se kunoyita botate. Kudwa ntolo ndagala nditjengeta tjilikadzi.

¹⁹Apa ndakatongolingilila nthu efa ngoshaya zwiambalo kene, kene nshayi ngosheta tjaangasungila natjo kene?

²⁰Apa aazondiboka kudwa mu moyo uwe, apa andizompa zwiambalo zwakathamwa nge wulu, yakabe idwa mu danga le pkhwizi dzangu kene?

²¹Apa ndakatongo bhayana ne siyamwa, ngoziba kuti ndowobakunda ku lubazhe kene?

²²Ha kwakajalo, luboko gwangu ngakushomoke mu thudzi, ngaguvunike pa malunganilo e thudzi.

²³Ngoti ndakabe nditja bushongola gwe Ndzimu, akuna kuti ndingabe ndakathama tjithu tjakajali saikoku!

²⁴“Ha ndakabiga kugalabgwe kwangu mu golide, kene ndakadwa golide nditi, ‘Ndiwe kugalabgwe kwangu,’

²⁵ha ndakashathila fumwa yangu hwulu, ne thundu yandashaba nge maboko angu,

²⁶ha ndakatongo linga zhuba lipenya kene mwedzi uyenda wakanaka,

²⁷kuli kuti zwakatongo nditjengela, ha zwithigamila ha zwinamata,

²⁸ikoku milandu yakafanila kuti isumikilisigwe, ngobe kowobe kudwa kuti ndakanyepela Ndzimu masimbawose.

²⁹“Ha kuli kuti ndakatongo shathila manikano dze tjita tjangu, kene kuli kushatha ha tjawigwa nge mang'oni,

³⁰andizotongo thama tjibi ngoleba nge nlomo wangu, ndilonga bhiso ngekwe butjilo gwatjo.

³¹Apa bashingi bangu bakabe basingatongo bhuzwa beti, ‘Ndiani watongoja kasigute nyama iye?’

³²Akuna n'yendi wakatongo lala kuzhe, ngobe mikoba yakabe igala yakazhuligwa nzhi.

³³Ha ndakasumbika matjinyo angu bathu bamwe sekwa banothama, ngekusumbika jinyo langu mukati kwangu,

³⁴ngoti ndakabe nditja mibunga, nditja kubhatisa shoni njudzi dza kanyi kwedu, kwakathama kuti ndigale ndakabgwata.

³⁵Apa ndiani unowonditeedza kene? Ndobiga tjinyala tjangu, ili butendeki gwe lebeswa langu, Masimbawose ngabandidabile. Handabe ndakabhata lukwalo gwakakwagwa nge tjita tjangu ngekwe milandu yangu.

³⁶Ndabe ndowoyenda ndakagusenga pamwe ne pamwe, ndabe ndowogusenga ne mu nsholo dumbu se tjiala,

³⁷Ndabe ndowoubudza ngekwe thambo dzangu dzose, se nkololo wa mambo ndabe ndowolingisana nawo.

³⁸“Ha kuli kuti nnda wangu unolila nge kwangu, ne ngolo dzawo dzose dzinyolo nge mishodzi,

³⁹ha kuli kuti ndakaja mitjelo yawo ndisingalipe, ha ndakabulaya beni bawo,

⁴⁰ipapo, mu bumo gwe mathunde ngaumele mihwa.” Matama a Jobe anoma ipapa.