Read Kalanga Jobe 32 Bible Online

Jobe 32 - Kalanga bible

Jobe 32

¹Ndizo balume ibaba batatu bakamisa kushandudzana na Jobe, ngobe Jobe wakabe ezwibona akalulwama.

²Ipapo Elihu nkololo wa Bharakeli we Mbhuzi we nsha wa Ramu kazhala bushongola kwazo. Elihu wakabe azhadziwa bushongola ndi Jobe ngoti Jobe wakabe ezwibona akalulwama pa Ndzimu,

³kakale wakagwadzilabo moyo bazwalani ba Jobe batatu ngoti basakawanila Jobe dabilo koga bakabhata be ntilika nlandu.

⁴Elihu wakabe akalindila kuti balebeleke na Jobe kutanga ngobe ibo bakabe bali bahwola munnli.

⁵Koga wakati ebona kuti akuna balume ibaba batatu tjabanobhula mu ndebeleko dzabo, Elihu kazhala bushongola kwazo.

⁶Ndizo Elihu nkololo wa Bharakeli we Mbhuzi kashandula eti, “Imi ndi ntjetjana nge makole, koga imwi mu bahwola, ndizo ndabe nditja kumubudza nkumbulo wangu.

⁷Ndazwidwa nditi, ‘Mazhuba ngaalebeleke, makole manjinji ngaadiye butjenjedu.’

⁸Koga i meya imu nthu, meya ya Masimbawose inonthama kuti ahwisise.

⁹Ate bahwola koga bakatjenjela, kene bosholotjena koga banohwisisa tjakalulwama.

¹⁰Ndizo nditi, ‘Munditeedze, imani ndilebe nkumbulo wangu.’

¹¹“Bonani ndabe ndakateedza matama enyu, ndabe ndakabhulutana kwazo sekwa mabemulebeleka.

¹²Ndabe ndakamuteedza nge njele, koga bonani, akuna walakidza nge buzhalo kuti Jobe u nlandu, kene iye wadabila matama awe pakati kwenyu.

¹³Mubone musitongoti, ‘Tabona butjenjedu? Ndzimu ndiwo unowotubula kusi nthu’

¹⁴Jobe aazobe akalingisanya matama awe nami, kakale anditondabila nge matama anonga enyu.

¹⁵“Batemeka mafupa, abatjina dabilo, abatjina ndodwa ne dama labangaleba.

¹⁶Apa ndilindile koga ibo basingatjalebeleke kene? Ngoti babe mile koga abatjadabila.

¹⁷Ndowolebabo tjandakaalakana, ndowomubudza nkumbulo wangu.

¹⁸Ndizhele matama andingaleba, meya imu ndili ino ndisendedzela kulebeleka.

¹⁹Bonani, mukati kwangu kuzhelilane se nkumbi umu gukhwa, ndodwa ndiphutuka tjibaka tjimwe ne tjimwe.

²⁰Ndakafanila lebeleka kuti ndisununguke. Ndakafanila zhula nlomo ha lebeleka.

²¹Akuna wandinolelekela kunli, akuna wandinowozipisa ndebo ku nshathisa.

²²Ngobe anditoziba zipisa ndebo ndishathisa bathu, ngoti Mbumbi wangu ungadwa endipedzisa.