Read Kalanga Jobe 33 Bible Online

Jobe 33 - Kalanga bible

Jobe 33

¹“Koga ngwenu Jobe ihwa ndebeleko yangu, uhwilile matama angu wose.

²Bona, ndozhula nlomo wangu ndakazwilulwamisila leba tjipa moyo wangu.

³Matama angu anodwa mu moyo wangu wakatambunuka, nlomo wangu unowoleba itjo tjandinoziba koga.

⁴Meya ye Ndzimu yakandibumba mafemo a Masimbawose anondipa butjilo.

⁵Undishandule, hautubula, lulwamisa ndebeleko iyo, tilingisane.

⁶Bona, mbeli kwe Ndzimu ndofanana koga nawe, namibo ndakabumbiwa nge vu koga sa we.

⁷Bona, akuna kutjiwa kwangu kwakafanila kukulobese hana, kubeyapo kwangu kokukulila.

⁸“Koga walebeleka ndakateedza nge dzangu zebe, ndakuhwa ulebeleka matama anoti,

⁹‘Ndimbuyanana, andina nlandu wandathama, ndakatjenapala, akuna jinyo mu ndili.

¹⁰Bona, Ndzimu unobona itoyi mundili, ukandibona ndili tjita tjawo.

¹¹Unosungila makumbo mu bhangwana, kayela njele zila dzangu dzose.’

¹²“Ngono, ima ndikudabile, autolebesa, Ndzimu nkulu kupinda nthu.

¹³Ini ukakabadzana nawo, uti, ‘Autodabila kene?’

¹⁴Ndzimu unolebeleka nge zila imwe, ukalebeleka kakale nge ipoga, nenguba bathu basina njele nako.

¹⁵Unolebeleka nge mawoloto ne nge mbono busiku, ha bathu bakaizela, bakaizela mu malawo abo,

¹⁶ipapo unozhula zebe dze bathu, ngono ukabatjenjedza ngekubatjisa,

¹⁷kuti ndizo bafupatile kutjinya kwabo ne kubadziba mukuzwikudza kwabo.

¹⁸Autobaletjedza bakawila mu gomba, unotjengeta bupenyu gwabo mu kulobesiwa nge thumo.

¹⁹“Nthu unosolobgwa shamu kabe mu thobo dzinopisa kabe mu zogwadza zwe mafupa anopanda kusingapele,

²⁰meya dzidze dzikati zwi ha dzibona zojiwa, ne zojiwa zwinozipa kawana zwimbipila.

²¹Nyama dzidze dzikashashamuka, mafupa awe akasala ali patjena.

²²Bupenyu gugwe kwasendela gomba, ne butjilo gugwe kuna ibabo banozhisa lufu.

²³Ha kuna ntumwa we Ndzimu ungama naye, ali n'gadzanyi muna bali tjiwulu (1 000), kowokumbuludza nthu kuti tjakanlulwamila nditjipi,

²⁴unangoni kunnli ngoni unoti, ‘Undzutunule mukungina mu gomba, ndawana tjinga ndzutunula,

²⁵mbili uwe unowobgwilila ku tjimo tje butjetjana,’ unobgwilila ku mazhuba e simba le butjetjana gugwe,

²⁶aetembezela Ndzimu ukan'amutjila, unozha mbeli kwawo nge kushatha, unom'bgwilizila mu tjimo tjekutanga,

²⁷Ngono unozwilebulula mbeli kwe bathu eti, ‘Ndakatjinya apambusa tjakabe tjakalulwama, koga andizolobgwa shamu yakandifanila.

²⁸Wakadzutunula bupenyu mukungina mu gomba, ngono butjilo gwangu gowobona tjedza.’

²⁹“Bona Ndzimu unothama zwithu izwezwi, unozwithama kabili ne katatu uthamila nthu,

³⁰kubuza bupenyu gugwe kudwa mu gomba, kuti ndizo abone tjedza tje butjilo.

³¹Undibhulutane kaa Jobe, nditeedze, nyalala ngono ndowolebeleka,

³²ha una tjimwe tjaunoshaka leba, utjilebe, lebeleka, ndoyemula kutendeka kuti wakatambunuka.

³³Ha usina tjaungaleba, unditeedze, nyalala, ndowokudiya butjenjedu.”