Read Kalanga Jobe 34 Bible Online

Jobe 34 - Kalanga bible

Jobe 34

¹Ipapo Elihu kati,

²“Ihwani matama angu, imwi balume bakatjenjela, mundibhulutane, imwi banoziba,

³Zebe dzohwa kene matama ezipa, koga se lulimi gulabila zojiwa kuti kene zozipa.

⁴Ngati shaluleni tjakalulwama, ngatiboneni pakati kwedu kuti tjakalulwama ini.

⁵Ngoti Jobe iye wati, ‘Andina nlandu, koga Ndzimu unolandula ndulamo yangu,

⁶nenguba ndisina nlandu, ndotogwa ndili nnyepi, mbonje yangu aitopola nenguba ndisina tjandatjinya.’

⁷Ndiupi nthu unonga Jobe kene, iye unong'wa madado se vula kene?

⁸Unogala ntutshi ne banothama mbipo, unoshingidzana ne bathu babi.

⁹Unoti, ‘Akutobhatsha tjimwe kushathila Ndzimu.’

¹⁰“Ndizo mundibhulutane imwi balume be hwisiso, ngakube kule kule ne Ndzimu kuti ungathama bubi, kukule na Masimbawose kuti ashinge tjisiitjo.

¹¹Unopa bathu mbayilo kuyendidzana ne zwabathama unopa mmwe ne mmwe kwa kanfanila.

¹²Ngelebeswa Ndzimu aaungathame bubi Masimbawose abangapambuse tjakatambunuka.

¹³Apa ndiani wakaupa simba le kulaula shango kene, ndiani wakaupa ndaulo ye shango yose kene?

¹⁴Ha Ndzimu ungazwitolegwa meya yawo, ukazwikubunganyigwa mafemo awo,

¹⁵ipapo bathu bose babe bewofa, bebgwilila mu hwuluba.

¹⁶“Ha una kuhwisisa, ihwa woku, bhulutana tjandinoleba.

¹⁷Apa iye usingade ndulamo ungabusa kene? Apa ungasola iye wakalulwama ne una masimba?

¹⁸Apa ate iwo unodwa bomambo uti ate betjimwe kene? Apa ate iwo unodwa banotolegwa pezhugwi uti babi kene?

¹⁹Automa ne balauli kene kuli kutolela bafumi pezhugwi kupinda bashayi, ngobe ibo bose nshingo we maboko awo.

²⁰Tingana tikafa takafala busiku. Ndzimu unotiloba tikafa bakasima unobalabhulila kutjena nge tjinyala.

²¹“Ngoti mesho awo anobona zila dze nthu, unobona thambo dzidze dzose.

²²Akuna zhalima lakati zwititi, lingabgwata banothama bubi.

²³Ndzimu autosheta kuti ungabigila nthu tjibaka, kuti azhe mbeli kwawo mu kusumikilisiwa.

²⁴Unolobesa bana masimba kuzhe kwe kushakisisa, kabiga bamwe mu magalo abo.

²⁵Ngobe unoziba zwabanothama, unobadusila kutjena kabalobesa tjinyolotjo.

²⁶Unoloba shamu banothama bubi, mbeli kwe mmwe ne mmwe akalinga,

²⁷ngobe bakaufupatila, bakasibe ne hanya nge zila dzawo.

²⁸Bakakombeledza bashayi kuti balilile ku Ndzimu ngono ukahwa tjililo tjabo bekumbila bhatsho.

²⁹Ngono koga ha Ndzimu unganyalala zwawo, ndiani ungautilika nlandu kene? Ha ungasumbika buso gwawo, ndiani ungaubona kene? Ngoti upezhugwi kwe itjaba ne nthu ngofanana,

³⁰ngoti akuna nthu usina Ndzimu ungabusa, ngoti ungayisa bathu ku ndashiko koga.

³¹“Kuna wakatongoti ku Ndzimu, ‘Ndi nlandu koga anditjowotjinya kakale,

³²undidiye tjandisingabone, ha ndina nlandu, anditjowothama kakale.’

³³Apa unoti uthame tjinoshakwa ndiwe kene, koga iwe ulamba kushanduka kene? Ndiwe wakafanila kutola thambo kusi imi, Ndizo kee leba tjaunoziba.

³⁴Bathu bana hwisiso banoti kundili, ne wakatjenjela unohwa tjandinoleba unowoti,

³⁵‘Jobe unoleba ngoshaya luzibo, matama awe aatopa tjedza.’

³⁶Kanukani tjinolebgwa ndi Jobe, nge kuti unolebeleka koga se nthu mbi.

³⁷Unopapha jinyo lile nge kupanduka, unodadila Ndzimu mbeli kwedu, unowatsha matama awe enyanyayidza Ndzimu.”