Read Kalanga Jobe 36 Bible Online

Jobe 36 - Kalanga bible

Jobe 36

¹Elihu kadwilila eti,

²“Ibe ne moyo nlefu kutukununu koga, ndowokulakidza tjimwe, nditjina tjimwe tjandingalebelekela Ndzimu.

³Ndowonotola luzibo gwangu kusipano, kukulakidza kuti Mbumbi wangu wakalulwama kungapani.

⁴Nge malebeswa matama angu aateali manyepkhwa, iye una luzibo umbeli kuko.

⁵“Bona Ndzimu nkulu seni, koga akuna waunolingila pasi, wakasima, una simba le hwisiso.

⁶Autoletjedzela babi bakatjila, koga banodziyila unobapa fanilo dzabo.

⁷Unogala wakabakilila balulwami, ngono unobatolela pezhugwi sa bomambo, ukathama kuti bakudziwe tjatjose.

⁸Koga ha bathu bakasungwa nge ketani, bebe bebhakhwa nge misungo ye kudziyila,

⁹unobabudza zwabakathama, kuti batjinya, bakazwibhata kwakabipa.

¹⁰Unobathama kuti bauteedze haubatjemela ngono ukabadwa kuti bashandukila bubi gwabo.

¹¹Ha beuteedza beushingila, banowidza mazhuba abo bakabhudilila ne makole abo bali mu kushatha.

¹²Koga ha basingauteedze, banowofa nge thumo ngono befa basina luzibo.

¹³“Usina Ndzimu mu moyo unogala akalamwa koga, aatokumbila bhatsho nenguba un'loba shamu.

¹⁴Banofa bali mu butjetjana gwabo, bhelelo le matjilo abo lobhatisa shoni.

¹⁵Unosunungula unodziyidzika mu kudziyidzika kukwe, uzhula zebe dzabo kuti bahwisise nge zogwadza.

¹⁶Nawe unokudana kuti ukuduse mu mang'oni, kukuyisa kwakazhuka kusina zwinodzibilidza, ukakupa zose zojiwa zwinozipa.

¹⁷“Koga ngwenu unolobgwa shamu ngekwe bubi, sumikiliso ne kululwamisiwa zwakakudzinga.

¹⁸Ngono ubone bushongola gusikutjengele ukatuka Ndzimu, usiletje tjizwimba nlomo tjikulu tjikakupambusa.

¹⁹Apa fumwa iyo ne masimba awo, zowokubhatsha aukumbila bhatsho kene?

²⁰Dumbu usiyemule kuti busiku, panowoti bathu bakalobesiwa mu magalo abo

²¹Ibe nge njele, usiwile mu bubi, gonga igo gwaunoda kupinda kudziyila.

²²Bona, Ndzimu unokudziwa mu simba lawo, ndiani ungadiya saiwo kene?

²³Ndiani ungadwa Ndzimu kuti uthameni, kene ungati, ‘Mathama kwakabipa kene?’

²⁴“Kumbula kukudza mishingo yawo, bathu yabakakudza beimba

²⁵Bathu bose bakabona tjawakayita, bathu banoilingila kule!

²⁶Bona, Ndzimu nkulu, kwatisingake tikauhwisisa! Mbalo ye makole awo akuna ungaiziba.

²⁷Unotola madokhwe e vula, ukaathama fulele ye vula inona.

²⁸Unothama kuti vula ine idwa mu makole, ili njinji inila bathu bose.

²⁹Apa kuna unoziba kuti makole anoyenda tjini kene? Apa kuna unoziba kuti tari inodadamula tjini kene?

³⁰Bona, unopaladza lupenyo gwe vula kuupoteleka, ukazwimba thiwa dze gungwa.

³¹Ngoti ndiko sekwa unosumikilisa bathu, upa zojiwa zwili zwinjinji.

³²Unozhadza maboko awo nge lupenyo gwe vula, ngono ukagudwa kuti gulobe pakalingisana.

³³Zhoba yago inoleba nge kwawo, ne ng'ombe dzoziba ngekwe kuloba kwago.