Read Kalanga Jobe 37 Bible Online

Jobe 37 - Kalanga bible

Jobe 37

¹“Ngekwako moyo wangu unoloba kwazo, unotjuluka kudwa mu magalo awo.

²Bhulutanani kudidima kwe hwi le Ndzimu, ihwani kubhonga kunodwa mu nlomo wawo.

³Lupenyo gugwe gwe vula gopenya gutendebukila ku zhuzhugwi kudwa tjose ku phelelo dze shango.

⁴Kudwa ipapo kotobela nsindo we kubhonga kwawo, unodadamula nge hwi lakasima awutobgwilila shule ndodwa!

⁵Ndzimu unobomba kunotjenamisa, unothama zwithu zwikulu zwatisingake tikahwisisa.

⁶Unoti ku kapuku, ‘Wila mu shango,’ ukadwa vula ukati, ‘Ina nge midumbi.’

⁷Ukamisa nthu mmwe ne mmwe kushinga, kuti ndizo bathu bazibe ngekwe mishingo yawo.

⁸Phuka dze shango dzongina mu mazwimba adzo, dzogala zwadzo mu makuwu adzo.

⁹Matutu anotutudza edwa ku burwa, phepo inotothola inodwa ku bunandzwa.

¹⁰Lufemo gwe Ndzimu gothama makaa, ne vula dzakawala dzikagamba.

¹¹Unosengesa gole lakasima vula, makole anoandamisa lupenyo gwawo.

¹²Zopoteleka zwikapoteleka zwilaugwa ndiwo, kushingikadza ndaulo dzose dzaunozwipa, mu shango yose koga.

¹³Ndzimu unozhisa makole kuloba bathu shamu, kene ukainisa vula kulakidza ludo gwawo gusingazunguzike.

¹⁴“Ima kutanga Jobe, teedza, kumbula mishingo ye Ndzimu inotjenamisa.

¹⁵Apa unoziba kuti Ndzimu unolaula makole tjini kene? Apa unoziba kuti unothama tjini kuti lupenyo gupenye kene?

¹⁶Apa unoziba tjakabhata makole kuti asiwile pasi kene? Apa unoziba makaabadzo aiye una zibo yakapelela kene?

¹⁷Iwe, we zwiambalo zwinokupisa, ha phepo ye burwa i hwuhwudza mu shango,

¹⁸apa ungabhatsha Ndzimu kuthama zhuzhugwi kene? Apa ungathama zhuzhugwi gwakasima se iponi tje phangula kene?

¹⁹Utibudze kuti tidwe Ndzimu titini, titini ngoti iswi timuzhalima koga.

²⁰Apa ubudziwe kuti ndilebeni kene? Andidi, kuti ndiko ukowotini kene? Undilobese?

²¹“Koga ngwenu akuna ungalinga zhuba, lipenya lili ku zhuzhugwi, zhuzhugwi gwakatjena kusina ndodwa ne gole.

²²Ku bunandzwa koboneka kupenya kwe golide, Ndzimu unoboneka mu kupenya ikoku kukulu.

²³Masimbawose atitobabona, bakulu mu simba labo ne ndulamo, kululwama kwabo kwakawanda abangabatshambilidze.

²⁴Ndizo, bathu banoutja, auna hanya na ibabo banozwidwa beti bakatjenjela.”