Read Kalanga Jobe 38 Bible Online

Jobe 38 - Kalanga bible

Jobe 38

¹Ipapo Yahwe bakadabila Jobe bali mu tjampupudze beti,

²“Apa ndiani iwoyu unodudumwa gumbuludzo langu, nge matama asina luzibo kene?

³Uzwilulwamise se nlume. Ndowokubhuzwisisa, ngono undidabile.

⁴“Wakabe ulingayi andisika shango? Undidabile ha una hwisiso nge kwako.

⁵Apa ndiani wakateya shango kuti ibe bukulu gungapa kene? Kene ndiani wakatala tjilizanyo tjayo kene?

⁶Thiwa dzayo dzigele muni kene? Ndiani wakabiga bgwe layo le ndzibo kene,

⁷ha nyenyedzi dze mangwanana dzimba dzose, ne bakololo bose be kudzimu bemimila nge kushatha kene?

⁸“Kene ndiani wakazhalila gungwa nge zwizhalilo kene, pagwakaphutuka kudwa mu tjibumbilo tje shango kene?

⁹Wakabe ulingayi ndifukidza gungwa nge makole, ndikalipetela nge zhalima kene?

¹⁰Wakabe ulingayi ha ndibiga migathu ye gungwa, ndilonga zwizhalilo zwago zwiberaberi kene?

¹¹Wakabe ulingayi ha ndidwa gungwa nditi, ‘Unopelela ipapa, ne mapundu awo e vula anozwikudza anomisiwa ipapa?’

¹²“Jobe, apa wakatongo laula mangwanana kene ukalakidza mazhokuyedza magalo awo kene?

¹³Wakatongo laya mazhokuyedza kuambadza mbizho dze shango, kuti babiibi babhude mu ali kene?

¹⁴Shango inobumbika se ntapkhwi ukusi kwe ntondo inotakika se tjiambalo.

¹⁵Babiibi bawana tjedza tjabo tjatogwa, luboko gwabo gwakamilidzigwa tjinya govung'wa.

¹⁶“Apa wakatongo noti ku misenya ye gungwa kene, kene ukayenda mu budzilo gwe gungwa kene?

¹⁷Apa wakatongo lakidziwa mikoba ye lufu, kene ukabona mikoba ye zhalima gulu?

¹⁸Apa unoziba kuti shango yakashatha kungapani kene? Undibudze ha uziba kose ikoku.

¹⁹“Apa unoziba kuti tjedza tjodwa ngayi kene, apa unoziba bugalo gwe zhalima kene?

²⁰Apa ungazwiyisa ku magalo azo kene? Apa unoziba zila inoyenda ku magalo azo kene?

²¹Nge malebeswa unoziba ngobe wakabe watjizwagwa kale! Wakatjila makole ali manji kwazo!

²²“Apa wakatongo ngina mu matula e kapuku kene? Kene kuli kubona matula e tjivulamabgwe kene?

²³Iwo andakabigila nsi we phipiti kene, nsi we kumukilana ne ngwa.

²⁴Apa unoziba zila inoyenda ku magalo anodwa lupenyo gwe vula, kene magalo iwo anotutudzila phepo dze kubhezhuba mu shango kene?

²⁵“Apa ndiani wakatsha ngolo dze vula nji kene? Apa ndiani wakathama zila ye lupenyo gwe vula kene?

²⁶Apa ndiani unonisa vula kusinga gale bathu kene? Apa ndiani unonisa vula mu tjilambanyika kusina ndodwa ne nthu kene?

²⁷Apa ndiani unodilidzila shango yakathukudzika yakawomelela, kuti ndizo bushwa guthinile kene?

²⁸“Apa vula ina tate kene? Kene ndiyani wakazwala madokhwe e khawa kene?

²⁹Apa makaa akadwa mu tjibumbilo tjaani kene? Apa ndiani wakazwala kapuku tjinowa kudzimu kene?

³⁰Itjo tjinoshandula vula ikabe bgwe kene, tjinogambisa gungwa kene?

³¹“Apa ungasunganya ketani dze Tjiyendan'gwi kene? Kene kuli kusunungula misungo ye Ngulube kene?

³²Apa ungazhisa nyenyedzi dze burwa nge zwibaka zwazo kene? Kene kutungamila nyenyedzi hwulu ne tukununu dze Ngulube kene?

³³Apa unoziba milayo inoyendisa mazhuzhugwi kene? Apa ungabiga ndaulo yawo mu shango kene?

³⁴“Apa ungamilidza hwi lilo ukalaula makole kene? Kuti nkubila we vula ukufukidze kene?

³⁵Apa ungatumila lupenyo kuti gulobe, igo gube guti, ‘Tipano towothama’ kene?

³⁶Apa ndiani wakapa makole butjenjedu kene, kene ndiani wakapa fulele hwisiso kene?

³⁷Apa ndiani una butjenjedu gwe kubala makole kene, kene ndiani ungatebula makukhwa e zhuzhugwi kene?

³⁸Ha hwuluba iwomelela, ibe duthu le mavu kene?

³⁹“Apa ungavimila shumbakadzi tjaingaja kene? Apa ungagutsha shumbana kene,

⁴⁰ha dzakalindila dzakabgwata mu makuwu, kene dzililele dzakalinda mu zwishaka kene?

⁴¹Apa ndiani unopa makungubo zojiwa, ha bana bawo belilila ku Ndzimu, beyenda yenda beshaka zojiwa kene?