Read Kalanga Jobe 39 Bible Online

Jobe 39 - Kalanga bible

Jobe 39

¹“Apa unoziba tjibaka tjinozwala n'gululu kene, kene unosolingilila ha zilawa izwala kene?

²Apa unoziba kuti inobe methu mimwedzi mingana kene, kene unoziba tjibaka tjadzinozwala kene?

³Apa unoziba tjibaka tjadzinolala pasi kene, dzizwala bana badzo kene?

⁴Bana badzo banokula bakasima, bakayenda ne shango bakayendila tjose.

⁵“Apa ndiani wakaletjedza madonki e shango kayenda, kene ndiani wakaasunungula kuti ayende kene?

⁶Ndakaapa tjilambanyika kube nzi wazo, ne ikwakwa kuti agaleko.

⁷Anogala kule kule ne zhoba ye mizi mikulu, aatohwa nsindo we bayendisi be dzikoloyi.

⁸Anofulila ku matombo kule kule, eshaka tjimwe ne tjimwe tjitala.

⁹“Apa nyati ingada kukushingila kene? Apa ingagala paunojisila zojiwa kene?

¹⁰Apa ungasunga nyati nge ntjili kuti ilime kene, kuti ikwebe bhadza mu nnda uwo kene?

¹¹Apa ungaigalabgwe nge masimba ayo makulu, kuti ikushingile nshingo uwo unolema kene?

¹²Apa unogalabgwe kuti inowobuya, ikawosengela mathunde awo ku lutombo kene?

¹³“Phowu inolobanya mapapilo nge shatho seni, koga aingahwuluke se hanganlobe.

¹⁴Ngobe inosiya mabumbulu ayo, ikaaletja akadziyisiwa nge nsetje,

¹⁵isingakumbule kuti gumbo lingaatshamba kapkhwanyika, nekuti phuka dzimwe dze shango dzingaapkhwanyabo.

¹⁶Inobhata bana bayo nge bukukutu, ungati ate bayo, ingati aina hanya ngekuti yakashingila suli.

¹⁷Hwuti Ndzimu auzoipa butjenjedu, ukasitongo ipa gobe mu kuhwisisa.

¹⁸Koga ha imilidza mapapilo ayo itizha, inoseka mbizi ne ntaswi wayo.

¹⁹“Apa ndiwe wakathama mbizi kuti dzisime kene, nekuti dzibe ne nzezema kene?

²⁰Apa ndiwe unodzithama kuti dzitjuluke se phashu kene, kuti dzitjise bathu nge bundula kene?

²¹Dzipala se nkono pa gwizi dzakashatha, dzikabhuda dzakasima dzinoshanganidza mbhatsha.

²²Adzitoziba lutjo kuti kodwiwani, adzitotja tjimwe. Adzitotja lingisana ne mathumo.

²³Mathumo anolila akasengwa ne batathi badzo, Mu ali kopenya nsebe ne thumo.

²⁴Nge kusima moyo ne bushongola inomidza shango, ne lunyanga gulila adzitoma.

²⁵Tjibaka ne tjibaka ha lunyanga gulila dzoti, ‘Ahaa!’ Ngono dzotunila ngwa dzitjikule kule, dzikahwa balauli be ngwa bemimila.

²⁶“Apa luphangu ha guwuluka, guangamadza mapapilo ago, guwulukila ku burwa gobe gwadiyiwa ndiwe kene?

²⁷Apa dzu lowulukila pezhugwi kunobaka shaka, pezhugwi nge ndaulo iyo kene?

²⁸Lobaka magalo alo mu matombo libe lilalako busiku, logala mu phaswa dze matombo ne mu theswi dzawo.

²⁹Ikoko loshaka tjalingaja, mesho alo anobona zwikule kule.

³⁰Majindana alo anong'wa malopa, ngono pana itumbu madzu aipapobo!”