Read Kalanga Jobe 4 Bible Online

Jobe 4 - Kalanga bible

Jobe 4

¹Ipapo Elifazi we N'temani kashandula eti,

²“Apa ha nthu angagwisa kulebeleka nawe ungan'gwadzila moyo kene? Ngono dumbu ndiani ungazwidziba mu kulebeleka kene?

³Bona, wakadiya banjinji, wakasimisa bana maboko ano lengezha.

⁴Matama awo akasimisa bakabe bedenga denga, wakasimisa ne zwidwi zwakabe zwitetema.

⁵Koga ngwenu zwawila iwe, ngono unopela meya, zwakuwila ngono unozwitoboka.

⁶Apa kutja Ndzimu kuko akuzofanila kube kudzikama kuko kene? Ne kube ne ntutshi kuko apa akuzofanila kube kugalabgwe kuko kene?

⁷“Tongokumbula koga, ndiani wakati asina nlandu kalobesiwa? Kene ndingayi kwakatongo lobesiwa nlulwami?

⁸Tjandakabona hwuti banolima mbipo, ne banodzwala mbipo banovuna izo.

⁹Mafemo e Ndzimu anobalobesa, banopelela mu phepo, nge phutuka kwe bushongola gwawo gobakolomodza.

¹⁰Kubomba kwe shumba ne tjema kwe shumbana, koga meno adzo anovunika.

¹¹Shumba yakasima inofa nge zhala ngosheta tjaingabhata, ngono shumbana dze shumbakadzi dzopalala nge shango.

¹²“Dama lakazhisiwa kundili nge kwakasumbikala, zebe dzangu dzakalihwa linyebezegwa.

¹³Mu mikumbulo yakadwa mu mbono dze busiku, ha bathu bakaizela hwope hwulu,

¹⁴kutja ne kutetema kwakandiwila, mafupa angu wose akatetema ngotja.

¹⁵Meya ikapinda mbeli kwangu, abhudiwa nge bana be mbaba.

¹⁶Ikama, koga ndakabe ndisingabonesese kuti ini, ifano tjikama mbeli kwangu kukabe ne kunyalala, ipapo ahwa hwi liti,

¹⁷‘Apa nthu koga unofa, ungabe nlulwami mbeli kwe Ndzimu kene? Apa ungabe mbuyanana kupinda Mbumbi uwe kene?

¹⁸Ha Ndzimu usingagalebgwe balanda bawo, utubula tilika batumwa bawo nlandu,

¹⁹kungapani kwaungathama ibabo banogala mu ng'umba dze vu, ibo bakadwa mu hwuluba, ibo banotsatugwa se hwungubele kene?

²⁰Pakati kwe mangwanana banokolomodziwa, kusina iye una njele nge kwabo.

²¹Atenti ha mbambo dze nshasha wabo dzishomogwa banofa basina butjenjedu?’