Read Kalanga Jobe 40 Bible Online

Jobe 40 - Kalanga bible

Jobe 40

¹Yahwe bakadwa Jobe bakati,

²“Apa n'ng'ong'oli unomilana na Masimbawose kene? Iye unonyanyaidzana ne Ndzimu ngaadabile!”

³Ipapo Jobe kashandula Yahwe eti;

⁴“Bonani, anditendili watjimwe, ndingadabila nditini? Ndobiga luboko gwangu pa nlomo koga.

⁵Ndaleba kang'ompela ngono anditjowodabila, gwe bubili, koga anditjowodwilila.”

⁶Ipapo Yahwe bakadabila Jobe bali mu tjampupudze beti;

⁷“Uzwilulwamise se nlume. Ndowokubhuzwisisa, ngono undidabile.

⁸Apa unowoti andizolulwama kene? Apa unowondibona nlandu kuti iwe ube wakalulwama kene?

⁹Apa una luboko gunonga gwe Ndzimu kene, ungabomba ne hwi linonga lawo kene?

¹⁰“Akwakajalo kee, uzwinakise nge bushe ne tjedza, uzwiambadze gudzo ne bubuya.

¹¹Lakidza bushongola gugo bukulu, ulinge mmwe ne mmwe unozwikudza ngono un'yise pasi.

¹²Linga mmwe ne mmwe unozwikudza ngono un'yise pasi, upkhwanyile babiibi pabamile.

¹³Ubavukidzile mu hwuluba bose, njiso dzabo udziyise kwadzisingowofa dzabongwa.

¹⁴Ngono imi nge kwangu ndowoduma, kuti luboko gugo gwe luji gungakutjidza.

¹⁵“Bona vubu, yandakabumba koga sekwa ndakakubumba bo. Inofula bushwa se ng'ombe.

¹⁶Bona masimba ayo amu thunji dzayo, ne matatabuko ayo amu nyama dze ntumbu wayo.

¹⁷Inomilidza mwise wayo ukasima se nti we nsida, ne makanyu e zwidzwa zwayo akasima dhi.

¹⁸Mafupa ayo akasima se phangula, ne makumbo ayo akasima se butale.

¹⁹“Ndiyo tjibumbiwa tjekutanga mu zwibumbiwa zwe Ndzimu, wakaibumba ngaabe iye ungaizhisila thumo.

²⁰Matombo anoidusila zojiwa, ipo panozanila phuka dzose dze shango.

²¹Inoti ikabutha kusi kwe miti, ikabgwata kusi kwe ishaka tje lushanga.

²²Mitutshi ye miti inoibakilila, miti inoyi wilo yakaipoteleka.

²³Bonani, nenguba gwizi gungazhala aitogutja, inogala yakatebama koga nenguba gwizi gungapa Jorodani gupalama nlomo wayo.

²⁴Apa ndiani ungaibhata yakanlinga kene? Apa ndiani ungaipubula tjimilo nge lubambo kene?