Read Kalanga Jobe 41 Bible Online

Jobe 41 - Kalanga bible

Jobe 41

¹“Apa ungadusa zhithu le gungwa linoyi Livatani nge hwuka kene? Kene kuli kusungilila lulimi gwalo nge ntjili kene?

²Apa ungalonga nsungo mu zwimilo zwalo kene? Kene kuli kulonga hwuka mu shaya dzalo kene?

³Apa lingakukumbila kene? Apa lingalebeleka nawe nge matama manyolo kene?

⁴Apa lingathama tjidumano nawe kene, tjekuti lowobe nlanda uwo butjilo gwalo gose kene?

⁵Apa ungazana nalo se unozana ne nyuni kene, ungayenda yenda nalo wakalilonga nsungo kulilakidza badwana kene?

⁶Apa babhati be hwobe bangaliyingidza kene? Apa bangalithubukanyila batengi kene?

⁷Apa ungazhadza mathumo mu ganda lalo kene? Kene kulikubhaya nsholo wayo nge mihwa kene?

⁸Biga maboko mulili ubone, autjofa wakuma kakale, autofa wakakangang'wa dzulana kwamunowodzulana.

⁹Bona, kugalabgwe kwe nthu wuzwibiga ludandi mu mesho, aelibona koga, unohwa epelegwa akalilinga.

¹⁰Akuna ndodwa ungalitanga. Apa ndiani ngono ungama akalingisana nami kene?

¹¹Apa ndiani wakatongo ndipa tjimwe ndin'bgwilizile itjo? Tjimwe ne tjimwe tjimu shango yose ngetjangu.

¹²“Ima ndikubudze ngekwe makumbo e zhithu le gungwa, ndikubudze kuti lakasima kakale lina masimba kungapani.

¹³Apa ndiani ungaliambula ganda lalo kene, ungapubula ganda lalo nge mbambo kene?

¹⁴Apa ndiani ungazhula nlomo walo kene? Meno alo anotjisa nge zila dzose koga.

¹⁵Ikamba tjalo zwivikili zwakatathikana zwakabhatshanyiwa kwakasima tjose,

¹⁶tjimwe ne tjimwe tjiwunde ne tjimwe, akuna ndodwa ne phepo inongina pakati kwazo.

¹⁷Zwakabhatshanyiwa kwazo, zwakanamatilana kwa zwisinganamutshuke.

¹⁸Alitshimuta kobhuda nthuto, mesho alo anonga mazazi e kuyedza.

¹⁹Mu nlomo walo kobhuda mithuto ye moto, sasi dzowuluka dzibhuda mulili.

²⁰Zwimilo zwalo zothungayila busi, se hali inobila ili mu moto we hwuni dze mpani.

²¹Nfemo walo unobhatidza masimbe, mu nlomo walo kobhuda bhuba le nthuto.

²²Ntshibha walo wakasima, kutjisa ku mbeli kwayo.

²³Mabundi e nyama dzayo akatathikana, akasima aatozunguzika, ndodwa.

²⁴Lina moyo wakasima se bgwe, se bgwe le gwiyo litjakusi.

²⁵Ali milika lotetemesa bakasima, bakahwumanyiwa nge lutjo.

²⁶Nenguba nthu elibhaya, thumo akuna tjalinothama, akuna bukano kene nsebe ungalihwisa zogwadza.

²⁷Butale golitola se lushanga, ne phangula se lukuni gwakabola.

²⁸Misebe aitothama kuti litizhe, mabgwe e tjivirimabgwe anonga bunye kulili.

²⁹Swimbo golitolabo se lushanga koga, loseka ibabo banoliposa nge mathumo.

³⁰Makwapa alo akusi anopitsha se zwiyenga, anoyenda etsha pasi esiya nkwala se tjileyi.

³¹Lobidza vula ye gungwa se hali inobila, likaithama kuti ikapaile se hali ye mafuta.

³²Lothama kuti palapinda vula isale ipenya, likasiya gungwa gwaka kapa mafulo.

³³Akuna tjimwe tjinofanana nalo mu shango yose, tjibumbiwa tjisingatje tjimwe ndodwa.

³⁴Lolingilila zose zwikulu lisingatje tjimwe, ndilo she muna zose zwinozwibona.”