Read Kalanga Jobe 5 Bible Online

Jobe 5 - Kalanga bible

Jobe 5

¹“Tjitongo dana ngwenu, apa kuna unowokudabila kene? Apa ndiupi we bayengemali waunowoshandukila kunli kene?

²Shungu dzobulaya tjilengwe! Fupa lobulaya nlelulelu.

³Imi ndakabona tjilen'gwe tjiwatshika nge midzi, koga tjinyolotjo alonga bhiso mu nsha watjo.

⁴Bana batjo abazobakililika, bano tshambilidziwa ku lubazhe akuna unobalebelekela.

⁵Banofa nge zhala banozwitolegwa tjaakavuna, bakatola nenge mathunde awe akamela pakati kwe mihwa, bana njemulo dzinopisa banoyemula thundu dzidze.

⁶Ngoti zogwadza azwitodwa mu hwuluba, mang'oni aatomela mu mavu.

⁷Koga nthu iye unozwaligwa mang'oni, anonga sasi dze moto dzinowuluka.

⁸“Koga imi, ndingabe ndishaka bhatsho ku Ndzimu, ndabe ndowobikila Ndzimu ndebo yangu,

⁹iwo unothama zwithu zwinotjenamisa kakale zwisingahwisisike, iwo unothama matjenamiso manjinji asina mbalo.

¹⁰Iwo unonisa vula mu shango, iwo unodilidzila shango.

¹¹Unomilidzila pezhugwi bapasi, ibabo banolila unobamilidzila kuna mbakililo.

¹²Iwo unodzinganyidza butjakwani gwe batjenjedu, kuti ndizo kushete tjabanothama tjinotubuka.

¹³Unobhatila batjenjedu mu butjakwani gwabo, njanga dze bupitipiti dzozha ku bhelelo tjinyolotjo.

¹⁴Zhalima lobawila kuli masikati, bakazwiwana beambaamba masikati se mu lima.

¹⁵Unodzutunula nshayi mu thumo linodwa mu milomo yabo, unobadzutunula mu maboko ebana masimba.[4]

¹⁶Kuti ndizo bashayi bawane kugalabgwe, nekuti anyaladze banobashayila ndulamo.

¹⁷“Bona, wakakombolegwa nthu unotjemegwa nge Ndzimu! Ndizo usilingile pasi kutjemegwa ndi Masimbawose.

¹⁸Ngobe unobanga banga, ngono ukalisunga, unoloba ngono maboko awo kapodza!

¹⁹Unowokudzutunula mu mang'oni ali tathatu, ngono gwe butendeka akuna mbipo inowoku kutha.

²⁰Mu nsi we bhamba unowokudzutunula mu lufu, mu nsi we ngwa unowokudzutunula mu simba le thumo.

²¹Unowokubakilila mu matama anopitsha, ngono autowotja ha golomodzo lizha.

²²Unowoti ubona bhamba ne golomodzo ukamwemwetela, ngono autotja zwibandana zwe shango.

²³Ngoti paunowolima kowobe kuli pa buyanana, zwibandana zwe shango zowobe zwakabakidzana nawe.

²⁴Unowoziba kuti nshasha uwo wakabakililika, unowoti ulinga zwithuwo zwizo ukawana zwilipo zose.

²⁵Unowoziba kuti bana babo bawanda, zwizekugwana zwizo zowobe zwinji zwikanga bushwa gwakaambadza shango.

²⁶Unowongina mu ikumbu wakula, se mathunde abidwa atjilulwamila vung'wa.

²⁷Bona, woku takakushakisisa, i lebeswa, bhulutana ngobe kwakululwamila.”