Read Kalanga Jobe 6 Bible Online

Jobe 6 - Kalanga bible

Jobe 6

¹Ipapo Jobe kashandula eti,

²“Dumbu shungu yangu ha ingabe ingayegwa, mang'oni angu wose kabigwa mu zwiyelo,

³nge lebeswa angalema kupinda nsetje we gungwa, ndizo dumbu matama angu epitsha zwingapa.

⁴Ngoti misebe ya Masimbawose imundili meya yangu inong'wa bushongola gwayo, Kutjisa kwe Ndzimu kwakandilingisana.

⁵Dumbu donki ye shango ingalilila zojiwa ina fulo kene? Kene ng'ombe ingalilila zojiwa yakabhata ija kene?

⁶Apa zojiwa zwisina n'jo zwingajika zwisina mwenyu kene? Kene kutjena kwe bumbulu[5] kungazipa kuli koga kene?

⁷Moyo wangu unoti zwi ha ndibona zojiwa zwakajali, zojiwa zwakajali zondibuzisa moyo.[6]

⁸“Ungati ndingawana tjandinokumbila, ungati Ndzimu ungandipa tjandinoyemula.

⁹Ungati kunga shathisa Ndzimu kundipeleledza, ungati ungatambunudza luboko gwawo ukandithubulila kutjena!

¹⁰Ipapo ndingabe ndowobe nditjina kunyaladzika, ndabe ndowoshatha nenguba ndili mu zogwadza zwingapani, ngoti andizonyanyayidza matama e Wakayengemala.

¹¹Dumbu simba langu ndilipi kuti ndingadzikitadza kene? Kakale bhelelo langu ini kuti ndingabe moyo nlefu kene?

¹²Apa simba langu longa simba le bgwe kene? Apa mbili wangu unonga phangula kene?

¹³Apa ndina simba kuzwibhatsha kene? Bhudilila kwatatiwa mundili.

¹⁴“Iye wakadziyidzika wakafanila thamigwa buthu nge nkwinya uwe, nenguba angadwa akafupatila kutja Masimbawose.

¹⁵Koga imwi zwikamu zwangu mu batjengedzi, motjengedza se lukobana gunotuta makuni,

¹⁶guna vula ina kapuku ne makaa akazwisumbika,

¹⁷koga kuti mu tjibaka tjekupisa enyawuka, kuti kopisa enyelela mu magalo awo.

¹⁸Bayendi banopambuka mu zila yabo betola zila ipoga, bakayenda mu shango yakawomelela ngono bakafa.

¹⁹Bayendi be Tema banoshaka vula, bayendi be Sheba banoishaka vula nge kugalabgwe!

²⁰Banotemeka mafupa ngoti babe begalabgwe, banoswika pa lukobana ngono bakapuna moyo.

²¹Saikoku ndiko sekwa muli iko kundili, mobona tjiga tjandiwila ngono motja.

²²Apa ndatongoti, ‘Mundipe tjipo?’ Kene kuli kuti, ‘Mu fumwa yenyu mundipe tjizwimba nlomo kene?’

²³Kene kuli kuti, ‘Mundiangule mu luboko gwe tjita kene?’ Kene kuli kuti, ‘Mundidzutunule mu luboko gwe batshambilidzi kene?’

²⁴“Mundidiye, ndowonyalala, Ndakatjinyani? Munditjenesele.

²⁵Lebeswa logwadza seni! Koga kutjemela kwenyu kotjemelani?

²⁶Apa mungati motjemela matama kene, ngono mutola matama e nthu wazwitoboka se phepo koga kene?

²⁷Mubuya mukalobela siyang'wa hakata, mubuya muteetshanya nkwinya wenyu.

²⁸“Koga ngwenu, shathilani kundilinga, andingatjanyepe mbeli kwenyu.

²⁹Shandukani kaa, letjani kulelekela ntome, ndomukumbila. Shandukani kaa, imi andina nlandu ipapa.

³⁰Kene kuna salulwama mu nlomo wangu? Kene moti anditoziba lebeswa kene?