Read Kalanga Jobe 7 Bible Online

Jobe 7 - Kalanga bible

Jobe 7

¹“Apa nthu aana nshingo wakasima mu shango kene? Apa mazhuba awe aatonga e nshingi wakatapiwa kene?

²Se nlanda unoyemula mitutshi ye madekwana, se nthu wakatapiwa wakalindila ndipo iye ye zhuba,

³ndizo ndapiwa mimwedzi ye suli, masiku e buyendasi ndakaapiwa.

⁴Andiizela ndozwibhuzwa nditi, ‘Ndowomuka lini?’ Koga busiku bulefu, ndolala ndipitukana kudzina kuyedza.

⁵Mbili wangu wakaambadziwa nge hwonyana ne shambgwa, ganda langu lowomelela, likakwanganyuka.

⁶Mazhuba angu anopinda elibilidza kupinda thali imu nnali, anopela koga kusina kugalabgwe.

⁷“Kumbulani, kuti butjilo gwangu i phepo koga, mesho angu aatjowofa abona tjakanaka kakale.

⁸Zhisho le unondibona alitjowondibona kakale, mowondishaka koga ndowobe ndisitjipo.

⁹Se gole linopaladza likasitjabong'we kwakajalo, nthu unongina mu gomba le lufu aatjabuya.

¹⁰Aatjowofa abgwilila ku ng'umba iye kakale, ne bugalo gugwe agutjowofa gwan'ziba.

¹¹“Nenguba kwakajalo andingazhalile nlomo wangu! Ndowolebeleka koga nenguba meya yangu ili mu buyendasi. Ndowong'ong'ola koga ndili mu kugwadzika.

¹²Apa ndi gungwa kene bhukanana le gungwa kene? Kwamungadzina mukandilisa kene?

¹³Ha nditi bulawo gwangu gowondinyaladza, bulalo gwangu gowobhatsha kutapudza ng'ong'ola kwangu,

¹⁴ipapo monditjisa nge mawoloto, mukandipalusa moyo nge mibono,

¹⁵kwandinowana ndishalula kusiniwa, pa kutjila ndili mafupa koga.

¹⁶Ndoshima butjilo gwangu, aanditowotjilila tjose. Mundiletje, ngoti butjilo gwangu i phepo koga!

¹⁷Apa nthu uni, kwamunga ntolela pezhugwi kene, kakale wamungashwa muna hanya nge kukwe kene?

¹⁸Wamungashwa mushola mangwanana mamwe ne mamwe kene? Wamungashwa mulika tjibaka ne tjibaka kene?

¹⁹Apa kowotola tjibaka tjingapani kudusa mesho enyu mundili, kene kundipa tjibaka tje fema kene?

²⁰Apa ha ndatjinya ndinga thamani kumuli imwe nlindi we bathu? Ini mandithama panobhaya nsebe wenyu kene? Ini ndabe ntolo mu muli kene?

²¹Ini musingandizwiibhatigwe milandu yangu kene? Ini musingaduse kutjena jinyo langu kene? Ngoti tjinyolotjo ndowobe ndabe mu gomba ndafa, ngono mowondishaka mukasindibone.”