Read Kalanga Jobe 9 Bible Online

Jobe 9 - Kalanga bible

Jobe 9

¹Jobe kashandula eti,

²“Nge malebeswa ndoziba kuti kwakajalo. Koga dumbu nthu ungabe nlulwami tjini mbeli kwe Ndzimu?

³Nenguba angada kunyanyaidzana nawo, aangatubule kuudabila bhuzo ne i nng'ompela muna dzili zwiwulu.

⁴Wakatjenjela kunotjenamisa ne simba lawo ligulu kwazo. Ndiani wakatongobe nsholo unopanda kaukunda kene?

⁵Unosedza matombo ngono matombo kasizibe, mu bushongola gwawo unoapitula.

⁶Unothama kuti shango itengenyeke mu magalo ayo, ne phanda dzayo dzizunguzike.

⁷Unodwa zhuba kuti lisibhude ngono likasibhude, unotundubadza nyenyedzi.

⁸Ndiwo woga unotambunudza kudzimu, ukakanyanga mapundu e vula ye gungwa.[8]

⁹Ndiwo wakathama nyenyedzi dze Jenjedzi ne Ngulube ne Tjiyendan'gwi ne dzi ku burwa,

¹⁰iwo unothama zwithu zwikulu kupinda hwisiso ye nthu ne matjenamiso manjinji asina mbalo.

¹¹“Aupinda pandili anditoubona, unodwilila upinda ngono anditoubona.

¹²Bonani, unodzamula tjaunoshaka ndiani ungaudziba? Apa ndiani ungaudwa kati, ‘Mothamani?’

¹³“Ndzimu autodziba bushongola gwawo, babhatshi ba Rahabhu banozwiyisa pasi kwawo.

¹⁴Dumbu imi ndingatubula kuudabila tjini wali? Ndingawana ngayi matama kukakabadzana nawo wali?

¹⁵Nenguba ndisina nlandu andingadabidzane nawo, ndingakumbila mahwilongoni koga mu nsumikilisi wangu.

¹⁶Nenguba ndingaudana ukadabila, andingadume kuti wabeungateedza hwi langu.

¹⁷Ngobe unondikatsha nge tjivulamabgwe, ukapapha mabanga kusingasheteke.

¹⁸Aungandiletje afema, koga unondizhadza ne zogwadza.

¹⁹Ha ili kuti ndingekwe masimba, wakasima dumbu! Ha ili ngekwe kushaka ndulamo, ndiyani ungaudanila kusumikilisiwa?

²⁰Nenguba ndingabe ndisina nlandu, matama angu abe ewolakidza ndili nlandu, nenguba ndisina nlandu, unowondibona nlandu.

²¹Andina nlandu, koga anditjina hanya nge kwangu, ndoshima butjilo gwangu.

²²Kofanana koga, ndizo nditi, unolobesa nlulwami koga se mbiimbi.

²³Mbatsha ha dzingazhisa lufu tjinyolotjo, unoseka nlulwami wawigwa nge mbatsha.

²⁴Shango ha yawila mu maboko e mbi, unosunga mesho e basumikilisi. Ha usi iwo, ndiani ngono?

²⁵“Mazhuba angu anolabuka kupinda tjilabuki, anowuluka kusina ndodwa ne shatho.

²⁶Mazhuba angu anopinda tjinyolotjo se n'goro nlelu we litokwe, se dzu lidzamula zojiwa.

²⁷Ha nditi, ‘Ndowokangang'wa kung'ong'ola kwangu, nditi ndowoshandula tjiso tjangu tjakafubala ha mwemwetela,’

²⁸ndiko kwandinotja kudziyidzika kwangu kose, ngobe ndoziba kuti aungafe wati andina nlandu.

²⁹Se ndowotilikiwa nlandu kale, ndozwidziyidzilani wali?

³⁰Nenguba ndingangula ne isipa nditjenesa maboko angu nge isipa.

³¹Ipapo mowondilashila mu gomba le madakalala, kunowoti ne zwiambalo zwangu zwikandishima.

³²Ngobe aute uli nthu sami kwandingati ndingadabidzana nawo, kwatingama mu lubazhe tikanyanyaidzana.

³³Akuna n'anguli pakati gwedu, ungama pakati kwe bubili gwedu,

³⁴ngaaduse shamu yawo mundili kuti ndizo kutjisa kwawo kusitongotja ndipalusamoyo.

³⁵Ipapo ndingalebeleka ndisingautje, koga sekwa kuli iko ngwenu akuzojalo mundili.