Read Kalanga Njimbo 10 Bible Online

Njimbo 10 - Kalanga bible

Njimbo 10

¹Ini mulimilile kule Yahwe? Ini muzwisumbika mu misi ye manikano?

²Nge kuzwikudza babi banodziyidza bashayi, ngababhakhwe nge matati abakateya ibo.

³Babi banozwikudza ngekwe yemula dzabo dzakabipa. Magovu anotuka akabuya akazwilandula Yahwe.

⁴Mu kuzwida kwabo, babi abatoshaka Ndzimu. Mikumbulo yabo inoti “Akuna Ndzimu.”

⁵Mishingo yabo inodwilila misi yose. Kusumikilisa kwenyu kupezhugwi, abatokubona zwita zwabo banozwidadila.

⁶Banozwidwa mu mimoyo yabo beti, “Akuna tjingatizunguza.” Mu zwizekugwana zose zwinowozha akuna tjingatiwila tjibibi.

⁷Milomo yabo izhele bhiso ne bupitipiti ne kutshambilidza, ndimi dzabo dzizhele kutjinya ne bubi.

⁸Unolalila bathu mu zwikotjo zwe mizi; Mu magalo akasumbikala unobulaya bathu basina nlandu.

⁹Unobgwatilila se shumba. Unobgwatilila kubhata bashayi. Unobhata bashayi ebakweba nge gwanga gugwe.

¹⁰Unokotama kazwilulwamisila kumadzuka, basina masimba banoligwa nge masimba awe.

¹¹Unozwidwa eti, “Ndzimu wakangang'wa, wazwimba buso gwawo awungandibone.”

¹²Milikani Yahwe! Milidzani luboko gwenyu Ndzimu. Musikangang'we bamukuhwisiwa zogwadza.

¹³Ini mbi eleba kusakalulwama ngekwe Ndzimu, ebe ezwidwa eti mu moyo uwe, “Amungandiyitile nlandu.”

¹⁴Koga mobona! Nge malebeswa wose moyela njele, bakamanikana bedziyidzika, kuti mubhatshe. Badziyili banogalabgwe mu muli. Mobhatsha siyang'wa.

¹⁵Pedzani masimba e mbi ne nshingi we mbipo. Thamani kuti kutjinya kukwe kupele.

¹⁶Yahwe ndibo mambo nge kusingapele, tjaba dzowoloba mu shango yabo.

¹⁷Yahwe, imwi mohwa yemula dze bana moyo minyolo, mowobasimisa, mukahwilila tjililo tjabo,

¹⁸kushingila ndulamo siyang'wa bakatshambilidziwa. Kuti ndizo nthu we shango ino asitjazhise kutjisa kakale!