Read Kalanga Njimbo 102 Bible Online

Njimbo 102 - Kalanga bible

Njimbo 102

¹Ihwani ntembezelo wangu, imwi Yahwe, tjililo tjangu ngatjiswike kumuli.

²Musindisumbikile buso gwenyu mu zhuba le kudziyidzika kwangu. Zhulani zebe dzenyu, mutjimbidze kundidabila andidana!

³Ngobe mazhuba angu anopinda se busi, mafupa angu anopisa se moto we vutho.

⁴Moyo wangu wakaputa wakaswaba se bushwa, ndokangang'wa kuja zojiwa.

⁵Anditjina nyama ndabe mafupa woga, ngekugomelela kwangu pezhugwi.

⁶Ndonga gola le tjilambanyika, se gunda le matongo.

⁷Ndolala ndakalinga, ndonga nyuni iyoga pezhugwi kwe tjilungwani tje ng'umba.

⁸Zwita zwangu zoshwa zwileba nge kwangu, ibabo banondigongobola banoshingisa zina langu kupa bhiso.

⁹Ndoja nlota se zojiwa, mishodzi yangu yakashangana ne tjandinong'wa,

¹⁰ngobe kugwadza moyo kwenyu kukulu, makandimilidza mukandiposela kutjena.

¹¹Mazhuba angu anonga ntutshi we madekwana, ndoswaba se bushwa.

¹²Koga imwi Yahwe, mugele mu bushe nge kusingapele kose, zina lenyu loswika ku zwizekugwana zose.

¹³Mowomilika mukahwilangoni Ziyoni, ngobe gwabe lubaka gwe kummilila, lubaka gwakabigwa gwatjiswika.

¹⁴Ngobe mabgwe awo ndianodika kwazo mu balanda benyu, kakale banohwila ngoni hwuluba yawo.

¹⁵Zwitjaba zowotja zina la Yahwe, na bomambo bose be shango banowotja gudzo labo.

¹⁶Ngobe Yahwe banowomusa Ziyoni kakale, banowoboneka mu gudzo labo.

¹⁷Banowodabila ntembezelo we bashayi, abatowolingila pasi ntembezelo wabo.

¹⁸Oku ngakukwaligwe tjizekugwana tjinowozha, kuti itjaba tjisathu tjazwagwa tjizhe tjikudze Yahwe.

¹⁹Ngobe bakalinga pasi kudwa kudzimu ku bugalo gwabo gwakayengemala, kudwa kudzimu Yahwe bakalinga shango,

²⁰kuti bahwe gomela kwe basungwa, kusunungula ibabo bakabe basumikilisigwa lufu,

²¹kuti ndizo balume basumikile zina la Yahwe mu Ziyoni, nekuti likudziwe mu Jerusalema,

²²ha zwitjaba zwikubungana, ne mibuso, kunamata Yahwe.

²³Bakanditema mafupa pakati kwe tjibaka, bakanditapudzila mazhuba e butjilo.

²⁴Ndoti, “Imwi Ndzimu wangu, musinditole makole angu atji pakati, makole enyu anoswika ku zwizekugwana zose.”

²⁵Imwi makati ntolo mukateya thiwa dze shango, nenge zhuzhugwi nshigo we maboko enyu.

²⁶Zowoloba, koga imwi mowogalila tjose. Zowoshakala se tjiambalo. Mozwilabadzana se zwiambalo, ngono zopinda,

²⁷koga imwi monga se kwamagala muli iko, ne makole enyu aana paanopelela.

²⁸Bana be balanda benyu banowotjila bakavikiligwa, bana babo banowotjilila mbeli kwenyu.