Read Kalanga Njimbo 103 Bible Online

Njimbo 103 - Kalanga bible

Njimbo 103

¹Kudza Yahwe, iwe meya yangu, ne zose zwimundili, ngazwikudze zina labo lakayengemala.

²Kudza Yahwe, iwe meya yangu, usikangang'we mbuzilo yabo yose.

³Ibo banozwiibhatigwa milandu iyo yose, banopodza magwele awo wose,

⁴ndibo banodusa butjilo gugo mu gomba, banokuambadza tjiala tje ludo gusingazunguzike ne ngoni,

⁵ibo banokugutsha nge zwakanaka butjilo gugo gose kuti ndizo butjilo gugo gube gutshwa segwe dzu.

⁶Yahwe banoshinga bubuya ne ndulamo muna bose banotshambilidziwa.

⁷Bakazibisa Mushe zila dzabo, mishingo yabo ku bathu be Iziraela.

⁸Yahwe bana ngoni ne lubu, abatotjimbidza gwadza moyo kakale bazhele ludo gusingazunguzike.

⁹Abatowogala betjemela, kakale abatogwadzilamoyo tjose.

¹⁰Abatoshingidzana naswi kuyendidzana ne zwibi zwedu, nenguba kuli kutibgwilizila kuyendidzana ne milandu yedu.

¹¹Sekwa kudzimu kuli pezhugwi kwe shango, ludo gwenyu gusingazunguzike bukulu seni muna ibabo banobatja!

¹²Sekwa kuli thambo kudwa mu bhezhuba kunoti ku golombedzo, sa ikoku, ndiyo thambo yabakatola kusuka matjinyo edu.

¹³Sekwa tate be bana bana ngoni mu bana babo, ndizo Yahwe bana ngonibo muna ibabo banobatja.

¹⁴Ngobe banoziba sekwa takabumbgwa, banokumbulukigwa kuti ti hwuluba.

¹⁵Ngekwe nthu, mazhuba awe anonga bushwa, unothinila se luba le shango.

¹⁶Phepo inofula pezhugwi kwalo, ngono likabe liyenda nayo, ne bugalo gwalo gube gwalikangang'wa tjose.

¹⁷Koga ludo gwa Yahwe gusingazunguzike gumuna ibabo banobatja, kudwa kusina budwilo kunoti kusingapele ne ndulamo yabo ku bana ne bana be bana babo,

¹⁸kuna ibabo banobhata tjidumano tjabo kakale bekumbulukigwa milayo yabo.

¹⁹Yahwe bakathama tjigalo tjabo tje bushe kudzimu, ne mbuso wabo unobusa kose.

²⁰Kudzani Yahwe, imwi mose batumwa babo be kudzimu, imwi bakasima banothama dama labo, imwi banohwilila dama labo labanoleba.

²¹Kudzani Yahwe, imwi mibunga yabo, bashingili babo banoshinga kuda kwabo.

²²Kudzani Yahwe, mose zwibumbiwa zwabo, mu magalo wose e mbuso wabo. Kudza Yahwe, iwe meya yangu.