Read Kalanga Njimbo 104 Bible Online

Njimbo 104 - Kalanga bible

Njimbo 104

¹Kudza Yahwe, iwe meya yangu. Imwi Yahwe Ndzimu wangu, mu nkulu kwazo. Makaambadziwa kutetiwa ne bushe,

²Makazwifukidza nge tjedza se tjiambalo. Imwi munobambula kudzimu se nshasha we saile.

³Imwi munomisa phanda dze mbako dzenyu mu vula, imwi munothama makole kara yenyu ye bushe, imwi motatha mapapilo e phepo,

⁴mothama phepo batumwa benyu, moto ne nthuto bashingili benyu.

⁵Mobiga shango mu thiwa dzayo, kuti ndizo isitongofa yazunguziwa.

⁶Moifukidza nge madziba e gungwa se tjiambalo, vula yakabe ilimile pezhugwi kwe matombo.

⁷Amutjemela banotizha, mu nsindo we kudadamula kwenyu bakatizha.

⁸Matombo akamilika, mikuku ikawungila pathu pamakailaulila.

⁹Makabiga n'gathu kuti ndizo basitongopinda, kuti ndizo basitongofukidza shango kakale.

¹⁰Mowungisila misenya mu mikuku, inowunga pakati kwe matuthu,

¹¹inong'wisa phuka imwe ne imwe, mbizi dze shango dzozwidusa nyota.

¹²Pawunde nayo nyuni dzobaka mashaka, dzomba dzili pakati kwe thabi dze miti.

¹³Kudwa mu bugalo gwenyu gu pezhugwi modilidzila matombo, shango inogutshiwa nge zwizwalo zwe nshingo wenyu.

¹⁴Momedzela ng'ombe bushwa, ne miti kuti ishingisiwe nge nthu, nekuti aduse zojiwa mu mavu,

¹⁵ne nkumbi kushathisa moyo we nthu, ne mafuta anothama kuti buso gugwe gupenye, ne zojiwa zwinogadza nthu moyo.

¹⁶Miti ya Yahwe inodilidzigwa kwazo, misida ye Lebanoni yabakadzwala.

¹⁷Nyuni dzobaka mashaka adzo muili, hwondo inobaka shaka layo mu miti isina mihwa.

¹⁸Matombo malefu anogala ngululu, shongwe i dizhilo le mbila.

¹⁹Makathama kuti mwedzi ulakidze misi ye gole, zhuba loziba tjibaka tjalo tjongina.

²⁰Mothama zhalima, kukabe busiku, lubaka gwe phuka dze shango dziyenda mulili.

²¹Shumbana dzobombela tjadzingabulaya, dzishaka zojiwa zwadzo mu Ndzimu.

²²Ha zhuba libhuda, dzonobgwata dzinolala mu mazwimba adzo.

²³Nthu unoyenda ku nshingo uwe, enoshinga kudza kube madekwana.

²⁴Zwakawanda seni zwithu zwamakathama, imwi Yahwe! Makazwithama zose nge butjenjedu, shango izhele zwitjili zwenyu.

²⁵Ndiyeno i gungwa, bukulu kakale gwakaashama, guna zwitjili zwinonyewula zwe bunji gusingabalike, zwitjili zose zwitukununu ne zwikulu kulu.

²⁶Zwikepe zoyenda muguli, ne zhithu le gungwa linoyi Livatani lamakabumba kuti lizanile muguli.

²⁷Zose izwezwi zwakalinga kumuli kuti muzwipe zojiwa mu tjibaka tjakalingisana.

²⁸Amuzwipa, zotjinunga, amufumbatunula tjiazha tjenyu, zogutshiwa nge zwithu zwakanaka.

²⁹Amusumbika buso gwenyu, zotja, amushomola meya yazo zofa, zwibe zwibgwilila mu hwuluba pazwakadwa.

³⁰Amudusa meya yenyu, muituma zobumbika, kakale mothama mbumbiko ye shango ikabe tshwa.

³¹Dzene gudzo la Yahwe lingama nge kusingapele, dzene Yahwe bangashathila mishingo yabo.

³²Ibo banolinga shango ikatetema, banokutha matombo kathungayila bhulubusi.

³³Ndowombila Yahwe mu butjilo gwangu gose, ndowomba ndikudza Ndzimu wangu anditjatjila.

³⁴Dzene kukumbula kwangu kungabashathisa, ngobe ndowoshatha ndili muna Yahwe.

³⁵Batjinyi ngabalobesiwe mu shango, ne babi basitjafe babepo. Kudza Yahwe, iwe meya yangu. Kudza Yahwe!