Read Kalanga Njimbo 105 Bible Online

Njimbo 105 - Kalanga bible

Njimbo 105

¹Tendani Yahwe, danani zina labo, thamani kuti mishingo yabo izibike mu bathu.

²Mubambile, imbani njimbo dzinobakudza, lebani ngekwe mishingo yabo yose inotjenamisa.

³Gudzo mu zina labo lakayengemala. Mimoyo ya ibabo banoshaka Yahwe ngaishathe.

⁴Shakani Yahwe nenge simba labo, dwililani mushake buso gwabo.

⁵Kumbulani mishingo inotjenamisa yabakathama, matjenamiso abo, nenge kusumikilisa kwabakathama.

⁶Imwi lutshinga gwa Abhurahama nlanda wabo, bakololo ba Jakubo, bashalugwa babo.

⁷Ndibo Yahwe Ndzimu wedu, kusumikilisa kwabo kumu shango yose.

⁸Banokumbulukigwa tjidumano tjabo nge kusingapele, ngekwe dama labakadwa, zwizekugwana zwili tjiwulu.

⁹Tjidumano tjabakathama na Abhurahama, kutuna kwabo begadzabgwe Isaki,

¹⁰kwabakatshambilidza muna Jakubo se nlayo, muna Iziraela tjili tjidumano nge kusingapele,

¹¹beti, “Ndowomupa shango ye Kanana se gobe lenyu kube lukata.”

¹²Pabakabe basibangana nge mbalo, bali bashomanana, kakale bali bazhi muili,

¹³beyenda kudwa mu tjaba imwe benoti ku imwe, bedwa mu mbuso mmwe benoti ku mmwe,

¹⁴akuna wabakadumilila kuti abatshambilidze, bakatjemela bomambo mu bumo gwabo,

¹⁵beti, “Musitongo kuma bazhodziwa bangu, musitongogwadzisa balebesambeli bangu.”

¹⁶Bakati bezhisa bhamba mu shango bakapedza zojiwa zose,

¹⁷bakabe batungamidza nlume mbeli kwabo, Josefa, wakabe atengesiwa ali nlanda.

¹⁸Makumbo awe akahwisiwa zogwadza nge miketani, ntshibha uwe wakapombedziwa tshipi,

¹⁹kuswikila tjaakaleba tjishingikala, dama la Yahwe lakanlika.

²⁰Mambo wakalaila kuti asunungugwe, nlauli we itjaba wakansunungula.

²¹Wakanthama she we ng'umba iye, ne nlauli we thundu iye yose,

²²kuti ape ndaulo hadzasha dzawo se kwaanoda kakale kuti adiye batungamili babe butjenjedu.

²³Ndizo Iziraela akazha mu Egipiti, Jakubo wakagala se nzhi mu shango ya Hamu.

²⁴Ngono Yahwe bakawatsha bathu babo kwazo, kakale bakabasimisa kupinda zwita zwabo,

²⁵bakashandula mimoyo yabo kuti babenge bathu babo, kuti bashinge ne balanda babo nge bupitipiti.

²⁶Bakatuma nlanda wabo Mushe, na Aroni ibo babakashalula.

²⁷Bakathama zwilakidzo zwabo pakati kwabo, ne matjenamiso mu shango ya Hamu.

²⁸Bakatuma zhalima, bakathama kuti shango iti zwii, bakashandukila matama abo

²⁹bakashandula vula dzabo dzikabe malopa, bakathama kuti hwobe dzabo dzife.

³⁰Shango yabo ikazhala mazhula, nenge mu ng'umba dza bomambo babo.

³¹Bakalebeleka, kukazha nlunda we thuzi, ne nyunyu dzikazhala mu shango yabo yose.

³²Bakabaligila tjivulamabgwe mu bumo gwe vula, ne lupenyo gwe vula gukapenya mu shango yabo yose.

³³Bakaloba mizhambi ne mipaya yabo, ngono bakavunilila miti ye shango yabo.

³⁴Bakalebeleka, phashu dzikazha ne phashwana dze bunji gusingabalike,

³⁵dzakaja zwimela zose mu shango yabo.

³⁶Bakabulaya mbano dzose mu shango yabo, zwizwalo zwe kutanga zwe simba labo lose.

³⁷Ndizo kapeleka Baiziraela bakasenga siliva ne golide, akuna ne nng'ompela mu ludzi gugwe wakakuthiwa.

³⁸Baiziraela bakati bemilika Egipiti ikashatha, ngobe bakabe bobatja.

³⁹Bakatambunudza gole kubafukidza, ne moto kuti kube ne tjedza busiku.

⁴⁰Bakakumbila, ngono bakabazhisila hwalishanga, bakabapa zojiwa zwinodwa kudzimu zwili zwinjinji.

⁴¹Bakazhula shongwe vula ikatebukana, ikawunga ipalama tjilambanyika se gwizi,

⁴²ngobe bakakumbulukigwa kugadzabgwe kwabo kwakayengemala, ne nlanda wabo Abhurahama.

⁴³Ndizo bakapeleka bathu babo ngekushatha, bashalugwa babo bemba.

⁴⁴Bakabapa shango dze zwitjaba, ngono bakazwitolegwa fumwa yakazwishabigwa nge zwitjaba,

⁴⁵kuti ndizo kubupelo babhate milayo yabo ne kutjengeta ndaulo dzabo. Kudzani Yahwe!