Read Kalanga Njimbo 106 Bible Online

Njimbo 106 - Kalanga bible

Njimbo 106

¹Kudzani Yahwe! Tendani Yahwe ngobe bakalulwama, ngobe ludo gwabo gusingazunguzike gumile nge kusingapele kose.

²Apa ndiyani ungaleba ngekwe mishingo mikulu ya Yahwe, kene kulakidza kukudziwa kwabo kene?

³Bakakombolegwa bana njele ne ndulamo, ibabo banothama ndulamo misi yose.

⁴Mundikumbule, imwi Yahwe, ha mumilila bathu benyu, mundibhatshe amubatjidza,

⁵kuti ndibone gombolelo le bashalugwa benyu, kuti ndishathile shatho ye itjaba tjenyu, kuti ndimukudzebo ne lukata gwenyu.

⁶Takatjinya iswi tose na bobatategulu bedu, takathama tjibi, tikathama bubi.

⁷Bobatategulu bedu bali ku Egipiti, abazothamila hanya mishingo yenyu inotjenamisa, abazokumbulukigwa bunji gwe ludo gwenyu gusingazunguzike, koga bakapandukila Upezhugwi pezhugwi pa Gungwa Shaba.

⁸Koga ibo bakababhatsha bethamila zina labo, kuti ndizo kuzibgwe ngekwe simba labo gulu.

⁹Bakatjemela Gungwa Shaba, gukapkhwa. Bakabatungamila mu tjilambanyika.

¹⁰Ndizo bakabadzutunula mu luboko gwe nnyanyayidzi, bakabadzutunula mu luboko gwe tjita.

¹¹Vula ika kwididza banyanyayidzi babo. Akuna ne nng'ompela wabo wakasala.

¹²Ndizo bakagalamoyo mu matama abo, bakamba njimbo dzinokudza Ndzimu.

¹³Koga tjinyolotjo bakakangang'wa mishingo yabo, abazolindila gumbuludzo labo.

¹⁴Koga bakabe ne kudzungayila kwe njemulo pakati kwe shango, ndizo bakalika Ndzimu mu tjilambanyika,

¹⁵Ukabapa tjabakabe bakumbila, koga ukatumila bugwele gwakabipa pakati kwabo.

¹⁶Balume ba mu mishasha bakathamila Mushe fupa na Aroni N'yengemali wa Yahwe,

¹⁷shango ikazhuka ikamidza Dathani, kakale ikavukidzila goko la Abiramu.

¹⁸Moto na iwobo ukamuka ukapisa goko labo, nthuto ukapisa babi.

¹⁹Bakathama ifano tje phulu ku Horebu ngono bakanamata ifano tjakabumbiwa.

²⁰Bakatetshanya gudzo le Ndzimu nge ifano tje ngabe inofula bushwa.

²¹Bakakangang'wa Ndzimu ntjidzi wabo, wakathama zwithu zwikulukulu mu Egipiti,

²²mishingo inotjenamisa mu shango ya Hamu, ne mishingo inotjisa pa Gungwa Shaba.

²³Ndizo wakabe eti unobalobesa, ha Mushe nshalugwa wawo, akabe, asama mu nkoto mbeli kwawo, kushandusa bushongola gwawo mu kubalobesa.

²⁴Ndizo bakasola shango inoyemulika, bakashaya kugalamoyo mu kugadzabgwe kwawo.

²⁵Bakang'ong'ola mu mishasha yabo, ngono bakasiteedze hwi la Yahwe.

²⁶Ndizo bakamilidza luboko gwabo bakatuna kuti banowobathama kuti bawe mu tjilambanyika,

²⁷kakale banowopaladza zwizekugwana zwabo nge zwitjaba, bebapaladza bezhala shango.

²⁸Ndizo bakazwibhatshanya na Bhaale we Pheori, bakaja zwibhayilo zwakapiwa bafi,

²⁹Bakashongola Yahwe bebagwadzisa moyo nge mishingo yabo mibi, ngono shamu ikabawila.

³⁰Ndizo Finihasi kamilika kabakumbilila, ngono shamu ikamisiwa.

³¹Ikoku kwakatogwa ili ndulamo ya Finihasi kudwa mu tjizekugwana kunoti ku tjimwe nge kusingapele kose.

³²Bakagwadzisa Yahwe moyo ku misenya ye Meriba, ngono Mushe wakangina mu manikano nge zila yabo,

³³ngobe bakadzonga meya dzidze, bakathama kuti Mushe alebe matama mafu.

³⁴Abazolobesa zwitjaba sekwa kwabakadwiwa ndi Yahwe,

³⁵koga bakalobolelana ne zwitjaba zwipoga ngono bakazwidiya mipanga yabo.

³⁶Bakashingila midzimu yabo, kwakabe gwanga ku bali.

³⁷Bakathama bakololo babo zwibhayilo ne bakololokadzi babo bakababhayila midzimu.

³⁸Bakatebula lopa lisina nlandu, lopa le bakololo ne bakololokadzi babo, babakadusa ili zwibhayilo ku midzimu ye Bakanana, ngono shango ikatemapadziwa nge lopa lile.

³⁹Bakazwitemapadza nge mishingo yabo, kakale bakathama bufukula nge zwabanoshinga.

⁴⁰Ndizo Yahwe bakagwadzila moyo bathu babo, ngono bakashima lukata gwabo,

⁴¹bakabalonga mu maboko e zwitjaba zwipoga, kuti ndizo babusiwe ndi ibabo bakababenga.

⁴²Zwita zwabo zwakabatshambilidza, bakakundiwa bakabe pasi kwe simba lazo.

⁴³Yahwe bakabagwila kanjinji, koga ibo bakabapandukila nge mazwimisilo abo, ngono bakayisiwa pasi ngekwe matjinyo abo.

⁴⁴Nenguba kwakajalo bakabayitila hanya mu kuhwa zogwadza kwabo, pabakahwa tjililo tjabo.

⁴⁵Bakakumbulukigwa tjidumano tjabo nge kwabo, kuyendidzana nge ludo gwabo gusingazunguzike bakabuza moyo.

⁴⁶Bakathama kuti bahwigwe zogwadza nge bathu bose bakabe bakabathama basungwa.

⁴⁷Mutitjidze, imwi Yahwe, Ndzimu wedu, kakale mutikubunganye kudwa mu zwitjaba, kuti ndizo tiboke zina lenyu lakayengemala ne gudzo mu kukudziwa kwenyu.

⁴⁸Ngakukudziwe Yahwe, Ndzimu we Iziraela, kudwa kusingapele kunoti kusingapele. Ngono bathu bose ngabati, “Ngakujalo.” Kudzani Yahwe!