Read Kalanga Njimbo 107 Bible Online

Njimbo 107 - Kalanga bible

Njimbo 107

¹Tendani Yahwe, ngobe bakalulwama, ngobe ludo gwabo gusingazunguzike gumile nge kusingapele kose.

²Bakadzutunugwa ndi Yahwe ngabalebe bejalo, ibabo bakadzutunugwa mu tjiazha tje tjita

³babazwibuzila kudwa mu shango, kudwa ku bhezhuba ne kudwa golombedzo, kudwa ku bunandzwa ne kudwa ku burwa.

⁴Bamwe bakadzungayila mu tjilambanyika tjisina ugele mutjili, basingawane zila inoyenda ku nzi nkulu kwabangagala.

⁵Bakabhakhwa nge zhala ne nyota, bakabe bepela meya.

⁶Ndizo bakalilila kuna Yahwe mukudziyidzika kwabo, ngono bakabasunungula mu manikano dzabo.

⁷Bakabatungamila nge zila yakatambunuka, kuswikila beswika ku nzi nkulu wabangagala.

⁸Ngababokele Yahwe ludo gwabo gusingazunguzike, nenge mishingo yabo inotjenamisa mu bathu.

⁹Ngobe banogukhwisa bana nyota, ne bana zhala banobagutsha nge zwithu zwakanaka.

¹⁰Bamwe bakagala mu zhalima ne mu lima dema lakatizwi, basungwa bali mu kuhwazogwadza ne mu dzitshipi,

¹¹ngobe bakapandukila matama e Ndzimu, bakalasha gumbuludzo le Upezhugwi zhugwi.

¹²Bakapaugwa nge nshingo unolema, bakawila pasi, kusina ne unobabhatsha.

¹³Ndizo bakalilila kuna Yahwe mu kudziyidzika kwabo, bakabatjidza mu kuhwazogwadza kwabo,

¹⁴bakabadusa mu lima ne mu zhalima lakati zwititi, bakathubula misungo yabo na pakati.

¹⁵Ngababokele Yahwe ludo gwabo gusingazunguzike, nenge mishingo yabo inotjenamisa mu bathu.

¹⁶Ngobe banopkhwanya matendele akathamwa nge phangula, bebuya bethubula mazhalilo e tshipi na pakati.

¹⁷Bamwe bakabe begwalisiwa nge zila dzabo dze bubi, kakale bakadziyila ngentha ye milandu yabo,

¹⁸zojiwa zose zwakabe zwibashimisa, bakashanduka pa gomba le lufu.

¹⁹Ndizo bakalilila kuna Yahwe mu kudziyidzika kwabo, ngono bakabatjidza mu kuhwazogwadza kwabo.

²⁰Bakatumila dama labo ngono likabapodza, likabatjidza mu kulobesiwa.

²¹Ngababokele Yahwe ludo gwabo gusingazunguzike nenge mishingo yabo inotjenamisa mu bathu.

²²Ngabaduse zwibhayilo zwe dendo, kakale balebe ngekwe mishingo yabo nge njimbo dzabo dze shatho.

²³Bamwe bakadelukila mu gungwa bali mu zwikepe, beshaba bali mu vula hwuluhwulu dze gungwa,

²⁴Bakabona mishingo ya Yahwe, mishingo yabo inotjenamisa mu kati kati kwe vula.

²⁵Ngobe bakalaula kukamilika matutu makulu, akamilidza matuthu e vula ye gungwa.

²⁶Akamidukila pezhugwi, kabgwilila mukati kati, bakatemeka mafupa bali mu mbatsha,

²⁷bakadzunguluka bakatshatsharika se bakalaladza, ne luzibo gwabo gukabe mwina we tjigu.

²⁸Ndizo bakalilila kuna Yahwe mu kudziyidzika kwabo, bakabadusa mu manikano dzabo,

²⁹bakadzikamisa dutu, ne matuthu e gungwa akadzikama.

³⁰Ndizo bakashatha ngobe zwakabe zwadzikama, bakanobaswikisa ku bukotokelo gwe njemulo dzabo.

³¹Ngababokele Yahwe ludo gwabo gusingazunguzike, nenge mishingo yabo inotjenamisa mu bathu.

³²Ngabamilidzile Yahwe pezhugwi mu gubungano le bathu, babakudze mu nshangano we bahwola.

³³Banoshandula njizi dzikabe tjilambanyika, misenya ikabe lidondo,

³⁴Shango ye zwizwalo ikabe gukuno, kuli ngekwe bubi gwe bagali bayo.

³⁵Banoshandula tjilambanyika madziba e vula, shango ye makwakwa ikashanduka misenya.

³⁶Banothama kuti bana zhala batjilile ipapo, kakale babake nzi unogagwa muuli,

³⁷banodzwala mu minda, bakadzwala minda ye mizhambi, ndizo bakavuna kunjinji.

³⁸Nge gombolelo labo, banowanda kwazo, ngono abatoletja ng'ombe dzabo dzitapudzika.

³⁹Abatapudzika bakabe bashomanana, balengudzika ngotshambilidziwa, kudziyidzika, nenge kuhwa zogwadza,

⁴⁰banotebulila kulengudzika mu hadzasha, bethama kuti badzungayile mu shango pasina zila,

⁴¹koga banomilidza basheti mu tshiyilo, bebe bewatsha misha yabo se ngubi ye pkhwizi.

⁴²Bakatambunuka banokubona bebe beshatha, koga babi bose banozhalila milomo yabo.

⁴³Batjenjedu ngabateedze zwithu izwezwi, kakale babe ne njele ngekwe ludo gusingazunguzike gwa Yahwe.