Read Kalanga Njimbo 109 Bible Online

Njimbo 109 - Kalanga bible

Njimbo 109

¹Imwi, Ndzimu wandinokudza, musinyalale koga!

²Ngobe milomo mibibi ne ye bupitipiti inondikuwelela, banoleba nge kwangu manyepkhwa.

³Banondipomba nge matama e lubengo kakale bendigwisa ndisina nlandu.

⁴Banoshandula ludo gwangu nge kundibenga, nenguba kwakajalo ndobatembezelela.

⁵Ndizo bakandibokela ndulamo nge mbipo, bakandibengela ludo gwangu.

⁶Banoti, “Mumbigile nthu mbiimbi mbeli kukwe, nthu unontilika nlandu ngaame ku luji gugwe.

⁷Ha esumikilisiwa, ngaawang'we nlandu, ntembezelo uwe ngautogwe se tjibi.

⁸Mazhuba awe ngaabe mashomanana, dzene mmwe angatola mamo awe.

⁹Dzene bana babe bangabe siyang'wa nenge nkadzi uwe kabe tjilikadzi.

¹⁰Dzene bana babe bangadzungayila beyenda bekumbila, dzene bangatakhwa mu matongo abanogala.

¹¹Dzene baanokolota bangantapila kose kwaanako, dzene bathu basingazibgwe bangantolela zwizwalo zwe dukuta lile.

¹²Dzene kungasheta unonhwilangoni, nenguba ali iye ungahwilangoni siyang'wa dzidze.

¹³Dzene lutshinga gugwe gungalobesiwa, dzene zina lile lingafidziwa mu tjizekugwana tje bubili.

¹⁴Dzene matjinyo a tate babe angakumbugwa mbeli kwa Yahwe, ne tjibi tja mmeyabe tjikasibukushiwe,

¹⁵ngazwidwilile zwili mbeli kwa Yahwe, ne kukumbugwa kukwe kulashiwe mu shango.

¹⁶Ngobe aazotongo kumbula kulakidza ngoni, koga wakadziyidza bashayi ne basheti ne be mimoyo yakapaluka kuswikila befa.

¹⁷Wakabe eda kulonga bhiso, bhiso ngalibe munlibo. Azobe eda kukombolegwa, makombolelo ngaabe kutjena naye.

¹⁸Wakazwiambadza bhiso se tjiambalo tjitje, dzene lingang'wila mu mbili uwe se vula, se mafuta mu mafupa awe.

¹⁹Ngalinge tjiambalo tjaanozwipomba nditjo, se mwandabula waanozwisunga ndiwo zhuba ne zhuba.”

²⁰Dzene ikoko kungabe mbayilo we banonditilika nlandu muna Yahwe, wa ibabo banoleba mbipo nge butjilo gwangu.

²¹Koga imwi, Yahwe She wangu, mundimile ngekwe zina lenyu, ngobe ludo gwenyu gusingazunguzike gwakalulwama, mundisunungule.

²²Ngobe ndi nshayi kakale ndi nsheti, ne moyo wangu wakabhayika mukati kwangu.

²³Ndopinda se ntutshi we madekwana, ndoshashamugwa se phashu.

²⁴Zwidwi zwangu zolengezha ngozwinyima zojiwa, anditjina nyama pa mbili.

²⁵Ndatjibe sapa muna ibabo banonditilika nlandu, ha bendibona, banodzungudza misholo.

²⁶Mundibhatshe imwi Yahwe, Ndzimu wangu! Munditjidze kuyendidzana nge ludo gwenyu gusingazunguzike.

²⁷Thamani kuti bazibe kuti igogu luboko gwenyu, imwi Yahwe, makuthama.

²⁸Bangabalonga bhiso, koga imwi mowokombolela. Dzene bagwisi bangu bangabhatisiwa shoni, nlanda wenyu ngaashathe.

²⁹Bagwisi bangu ngabalengudzike, shoni ngadzibakombole bange basakaambala.

³⁰Nge nlomo wangu ndowoyisa mboko hwulu kuna Yahwe, ndowokudza Yahwe pakati kwe mbunga we bathu.

³¹Ngobe banoma ku luboko gwe luji gwe basheti, kuti babatjidze muna ibabo bangabalashila mu lufu.