Read Kalanga Njimbo 115 Bible Online

Njimbo 115 - Kalanga bible

Njimbo 115

¹Kusi ku tili, imwi Yahwe, kusi ku tili, koga ku zina lenyu ngakube ne gudzo, ngentha ye ludo gwenyu gusingazunguzike ne kugalikabgwe kwenyu.

²Ini zwitjaba zwingati, “Ndzimu wabo ungayi?”

³Ndzimu wedu u kudzimu, unothama tjaunoda.

⁴Midzimu yabo i siliva ne golide, zwakathamwa nge maboko e bathu.

⁵Ina milomo koga ayitolebeleka, ina mesho koga ayitobona.

⁶Ina zebe koga ayitohwa, zwimilo zwayo azwitonuhwigwa.

⁷Ina maboko ngono ayitohwa tjayabhata, ina makumbo ngono ayitoyenda, ayina hwi lainothama nge hwulo dzayo.

⁸Ibabo banoithama banonga iyo, na bose banogalabgwe muili.

⁹Iwe Iziraela, galabgwe muna Yahwe! Ndibo bhatsho ne tjivikili tjabo.

¹⁰Iwe ng'umba ya Aroni, galabgwe muna Yahwe, ndibo bhatsho ne tjivikili tjabo.

¹¹Imwi banotja Yahwe, galanibgwe muna Yahwe! Ndibo bhatsho ne tjivikili tjabo.

¹²Yahwe bagala bakatikumbula, banowotikombolela, banowokombolela ng'umba ya Iziraela, banowokombolela ng'umba ya Aroni.

¹³Banowokombolela ibabo banotja Yahwe, batukununu ne bakulukulu bose ngofanana.

¹⁴Dzene Yahwe bangamuwatsha, mose imwi ne bana benyu.

¹⁵Dzene mungakombolegwa ndi Yahwe, ibo bakathama kudzimu ne shango.

¹⁶Kudzimu ndekwa Yahwe, koga shango bakaipa bathu.

¹⁷Bafi abatokudza Yahwe, kene ibo banodelukila ku lunyalalo.

¹⁸Koga ndiswi tinowokudza Yahwe kudwa ngwenu kunoti kusingapele. Kudzani Yahwe.