Read Kalanga Njimbo 116 Bible Online

Njimbo 116 - Kalanga bible

Njimbo 116

¹Ndoda Yahwe, ngobe bakahwa hwi langu ne mitembezelo yangu.

²Ngobe bakanditeedza, ndizo ndowobadana, mu butjilo gwangu gose.

³Misungo ye lufu yakabe yakandipomba, zwibhayo zwe gomba le lufu zwakabe zwakandibhata, ndakakuligwa nge buyendasi nenge kuzhaligwa.

⁴Ndizo ndakadana zina la Yahwe: “Imwi Yahwe, ndomukumbila, munditjidze!”

⁵Yahwe bana ngoni, kakale bakalulwama Ndzimu wedu una lubu.

⁶Yahwe banogwila basingatubule ndakati ndikong'wa, bakanditjidza.

⁷Bgwilila, iwe meya yangu mu kunyaluluka kuko, ngobe Yahwe bagala bakakululwamila.

⁸Ngobe imwi Yahwe, makadusa meya yangu mu lufu, mukapkhwisa mishodzi mu mesho angu, mukaleesa makumbo angu mu kukuthiwa.

⁹Ndoyenda mbeli kwa Yahwe mu shango ye batjili.

¹⁰Ndakadwilila nge kugalamoyo kwangu, aleba nditi, “Ndakamanikana kwazo.”

¹¹Mu gaabadzo langu ndakati, “Bathu bose abatogalikabgwe.”

¹²Apa ndowopani Yahwe pezhugwi kwe bubuya gose gwabakandithamila kene?

¹³Ndowomilidza nkombe we jidzo ngono adana zina la Yahwe.

¹⁴Ndowoshingikadza tuna kwangu kuna Yahwe mbeli kwe bathu babo bose.

¹⁵Lufu gwe balulwami, gosheteka mu mesho a Yahwe.

¹⁶Imwi Yahwe, ndi nlanda wenyu, ndi nlanda wenyu, nkololo we nlandakadzi wenyu. Makanyebesa misungo yangu.

¹⁷Ndowomudusila tjibhayilo tje dendo ndibe ndidana zina la Yahwe.

¹⁸Ndowoshingikadza tuna kwangu kuna Yahwe mbeli kwe bathu babo bose,

¹⁹mu misha ye ng'umba ya Yahwe, pakati kuko, iwe Jerusalema. Kudzani Yahwe.