Read Kalanga Njimbo 118 Bible Online

Njimbo 118 - Kalanga bible

Njimbo 118

¹Isani dendo kuna Yahwe, ngobe bakalulwama, ludo gwabo gusingazunguzike gumile nge kusingapele.

²Iziraela ngaati, “Ludo gwabo gusingazunguzike gumile nge kusingapele.”

³Be ng'umba ya Aroni ngabati, “Ludo gwabo gusingazunguzike gumile nge kusingapele kose.”

⁴Ibabo banotja Yahwe ngabati, “Ludo gwabo gusingazunguzike gumile nge kusingapele kose.”

⁵Ndakati ndili mu buyendasi adana Yahwe, bakandidabila nge kundisunungula.

⁶Yahwe bamile nami, anditotja. Apa ndingashingwani nge nthu wali?

⁷Yahwe bamile nami kuti bandibhatshe, ndolinga zwita zwangu zwikundiwa.

⁸Koyita kutizhila muna Yahwe pana kugalabgwe mu nthu.

⁹Koyita kutizhila kuna Yahwe pana kugalabgwe mu bakololo be bushe.

¹⁰Zwitjaba zose zwakandipoteleka, koga nge zina la Yahwe ndakazwitemelela.

¹¹Zwakabe zwakandikomba ntha dzose, koga nge zina la Yahwe ndakazwitemelela!

¹²Zwakabe zwakandimomotela se nyutji zwithathanyika se moto we mimihwa, koga nge zina la Yahwe ndakazwitemelela!

¹³Ndakatshindikigwa shule kwandakashokowa koga Yahwe bakandibhatsha.

¹⁴Yahwe ndibo simba langu ne lumbo gwangu, batjibe ibo jidzo langu.

¹⁵Mipululu ye shatho ne kukunda inohwika mu mishasha ye balulwami beti, “Luboko gwe luji gwa Yahwe gwakathama zwikulu!

¹⁶Luboko gwe luji gwa Yahwe gomilidzigwa pezhugwi! Luboko gwe luji gwa Yahwe gwakathama zwikulu!”

¹⁷Andingafe, koga ndowotjila, ndibuya nditaula ngekwe mishingo ya Yahwe.

¹⁸Yahwe bakandiloba kunogwadza, koga abazondibulaya.

¹⁹Mundizhulile mikoba ye ndulamo, kuti ndingine ndiyo nditende Yahwe.

²⁰Iwoyu ndiwo nkoba wa Yahwe balulwami banowongina ndiwo.

²¹Ndomutenda ngoti makandidabila kakale mabe jidzo langu.

²² Bgwe lakalambiwa nge babaki ndilo latjibe bgwe linotambunudza mbako.

²³Ikoku ndikwakathamwa ndi Yahwe, kotjenamisa mu mesho edu.

²⁴Ileli ndilo zhuba lakathamwa ndi Yahwe, ngatishatheni tishaladuke mulili.

²⁵Mutitjidze, tomukumbila imwi Yahwe, imwi Yahwe, tomukumbila, mutipe kukunda!

²⁶Wakakombolegwa iye unozha nge zina la Yahwe. Tomukudza kudwa mu ng'umba ya Yahwe.

²⁷Yahwe ndibo Ndzimu, kakale bakatipa tjedza. Makabhata thabi, thamani nlongolongo, muswike pa tjibeso tjinopisigwa zwibhayilo.

²⁸Mu Ndzimu wangu, ngono ndowomutenda, mu Ndzimu wangu, ndowomukudza.

²⁹Tendani Yahwe, ngobe bakalulwama, ngobe ludo gwabo gusingazunguzike gumile nge kusingapele kose.