Read Kalanga Njimbo 119 Bible Online

Njimbo 119 - Kalanga bible

Njimbo 119

¹Bakakombolegwa ibabo be zila dzakatambunuka, banolondolodza nlayo wa Yahwe.

²Bakakombolegwa ibabo banobhata ndaulo dzabo, banobashaka nge mimoyo yabo yose,

³kakale basingathame tjakabipa, koga beyenda mu zila dzabo.

⁴Makabiga milayo yenyu kuti ilondolodziwe nge buzhalo.

⁵Dzene zila dzangu dzabe dzakatambunuka mu kubhata milayo yenyu!

⁶Ndizo anditowobhatisiwa shoni, andina hanya ne milayo yenyu yose.

⁷Ndowomukudza nge moyo wakatambunuka, andizwidiya ndaulo dzenyu dzakayengemala.

⁸Ndowotobelela milayo yenyu musindilashile tjose.

⁹Apa bathu batjetjana bangathama tjini kuti zila dzabo dzigale dzili dzakatjenapala kene? Nge kudzitjengeta kuyendidzana nge dama lenyu.

¹⁰Ndomushaka nge moyo wangu wose, musitongondiletja asalondolodza milayo yenyu.

¹¹Ndakabiganya dama lenyu mu moyo wangu, kuti ndisitongo mutjinyila.

¹²Kukudziwa ngakube kumuli, imwi Yahwe, mundidiye milayo yenyu.

¹³Nge nlomo wangu ndoleba ndaulo dzose dzodwa mu nlomo wenyu.

¹⁴Ndoshathila kutobelela milayo yenyu, sekwa nthu angashathila fumwa dzose.

¹⁵Ndowokumbula ngekwe milayo yenyu, ndibe ndizwilingisanya ne zila dzenyu.

¹⁶Ndowoshathila milayo yenyu, anditowokangang'wa dama lenyu.

¹⁷Bhatani nlanda wenyu zubuyanana, ngono ndowotjila alondolodza dama lenyu.

¹⁸Zhulani mesho angu, kuti ndizo ndibone zwithu zwinotjenamisa zwinodwa mu nlayo wenyu.

¹⁹Ndi nzhi mu shango, musindisumbikile milayo yenyu.

²⁰Ndojika mu moyo nge ishubo ngekwe ndaulo dzenyu mu zwibaka zose.

²¹Motjemela ibabo banozwikudza, bana bhiso banomiligwa nge milayo yenyu.

²²Dusani masapa abo ne kundidadila kwabo mundili, ngobe ndolondolodza milayo yenyu.

²³Nenguba hadzasha dzigalapasi dzindilukila gwanga, nlanda wenyu unowokumbula ngekwe milayo yenyu.

²⁴Milayo yenyu i shatho yangu, ndiyo bakumbuludzi bangu.

²⁵Meya yangu yakakotama ndanamatila mu hwuluba, mundimuse ngekwe dama lenyu.

²⁶Ndakatindizwileba zwandakathama, mukandidabila, mundidiye milayo yenyu.

²⁷Mundithame ndihwisise zila dze milayo yenyu, ndizo ndowokumbula ngekwe matjenamiso enyu.

²⁸Meya yangu yakanyala ngentha ye buyendasi, mundimuse ngekwe dama lenyu.

²⁹Dusilani zila dze manyepkhwa kutjena nami, mundidiye nlayo wenyu ne ngoni.

³⁰Ndakashalula zila ye kugalikabgwe ndakabiga ndaulo dzenyu mbeli kwangu.

³¹Ndakanamatila milayo yenyu, imwi Yahwe, thamani kuti ndisibhatisiwe shoni.

³²Ndowolondolodza milayo yenyu ndakalonga meya mu nyama, apaphidza kuhwisisa kwangu.

³³Mundidiye, imwi Yahwe, zila ye milayo yenyu, ngono ndowoilondolodza kunoti ku bupelo.

³⁴Mundipe kuhwisisa, kuti ndilondolodze nlayo wenyu ndibe ndiutjengete ne moyo wangu wose.

³⁵Munditungamile mu zila ye milayo yenyu, ngobe ndoyishathila.

³⁶Tendebudzilani moyo wangu ku milayo yenyu, kusi kushaba kwe bugovu.

³⁷Shandusani mesho angu mu kulinga zwisi zwa tjimwe, mundipe butjilo mu zila dzenyu.

³⁸Zhadzisani kugadzabgwe kwenyu, mu nlanda wenyu, ikoku kwa ibaba banomutja.

³⁹Shandulilani kulengudzika kwandinotja kutjena nami, ngobe ndaulo dzenyu dzakalulwama.

⁴⁰Bonani ndakashuba milayo yenyu, mu ndulamo yenyu mundipe butjilo.

⁴¹Ludo gwenyu gusingazunguzike ngaguzhe kundili imwi Yahwe, jidzo lenyu kuyendidzana nge kugadzabgwe kwenyu.

⁴²Ndizo ndodabila ibabo banondidadila, ngobe ndogalabgwe mu dama lenyu.

⁴³Musitole dama le malebeswa mu nlomo wangu, ngobe kugalabgwe kwangu kumu ndaulo dzenyu.

⁴⁴Ndowolondolodza nlayo wenyu, nge kusingapele kose.

⁴⁵Ndowoyenda ndakasununguka, ngobe ndakashaka milayo yenyu.

⁴⁶Ndowolebeleka ngekwe milayo yenyu mbeli kwa bomambo kakale anditowobhatisiwa shoni,

⁴⁷Ndoshathisiwa nge milayo yenyu, ngobe ndoida.

⁴⁸Ndowomilidzila maboko ku milayo yenyu, iyo yandinoda, kakale ndowokumbula ngekwe milayo yenyu.

⁴⁹Kumbulani dama lenyu ku nlanda wenyu, ngobe makandipa kugalabgwe.

⁵⁰Ndilo linondinyaladza mu kudziyidzika kwangu, ngekuti kugadzabgwe kwenyu konditjidza.

⁵¹Banozwikudza banondidadila kusina tjilizanyo, koga anditoshandukila nlayo wenyu.

⁵²Ndokumbula ndaulo dzenyu dza ntolo imwi Yahwe, ndowana nyaladzo mudzili.

⁵³Moyo wangu unopisa ngekwe babi, ibabo banoletjedza nlayo wenyu.

⁵⁴Milayo yenyu yagala ili njimbo dzangu, mu ng'umba yandinolala ndili mu gwendo.

⁵⁵Mu busiku ndokumbula zina lenyu, imwi Yahwe, kakale ndolondolodza nlayo wenyu.

⁵⁶Makombolegwa andakapiwa, ngobe ndakalondolodza milayo yenyu.

⁵⁷Yahwe ndibo gobe langu, ndogadzabgwe kuti ndowohwa matama enyu.

⁵⁸Ndakashaka buso gwenyu nge moyo wangu wose, ibeni nge ngoni nami kuyendidzana nge kugadzabgwe kwenyu.

⁵⁹Ndakalingisisa zila dzangu, ashandusila makumbo angu ku milayo yenyu,

⁶⁰Ndowolibilidza, ndisinganonoke kulondolodza milayo yenyu.

⁶¹Nenguba misungo ye babi indipomba, anditowokangang'wa nlayo wenyu.

⁶²Busiku ndomukila kumukudza, ngekwe ndaulo dzenyu dzakayengemala.

⁶³Ndi nzwalani wa bose banomutja, wa bose banolondolodza milayo yenyu.

⁶⁴Imwi Yahwe, shango izhele ludo gwenyu gusingazunguzike, mundidiye milayo yenyu.

⁶⁵Makathamila nlanda wenyu bubuya, kuyendidzana ne dama lenyu, imwi Yahwe.

⁶⁶Mundidiye kusumikilisa kwakatambunuka ne luzibo, ngobe ndogalamoyo mu milayo yenyu.

⁶⁷Ndakati ndisathu alobgwa shamu ndakabe ndakalashika, koga ngwenu ndohwa dama lenyu.

⁶⁸Makalulwama kakale mothama bubuya, mundidiye milayo yenyu.

⁶⁹Banozwikudza banondibhomedza manyepkhwa, koga ndobhata milayo yenyu nge moyo wangu wose.

⁷⁰Mimoyo yabo mikodu, koga imi ndoshathila nlayo wenyu.

⁷¹Kwakandilulwamila kuti ndibe ndakalobgwa shamu, kuti ndizo ndizwidiye milayo yenyu.

⁷²Nlayo we nlomo wenyu wakandinakila kwazo kupinda zwiwulu zwinjinji zwe siliva ne golide.

⁷³Maboko enyu akandithama kakale kandibumba, mundipe hwisiso kuti ndizwidiye milayo yenyu.

⁷⁴Ibabo banomutja banowondibona bakashatha, ngobe ndakagalamoyo mu dama lenyu.

⁷⁵Ndoziba, imwi Yahwe, kuti kusumikilisa kwenyu kwakatambunuka, ngoti makandiloba shamu nge kugalikabgwe kwenyu.

⁷⁶Ludo gwenyu gusingazunguzike gumilile kundinyaladza, kuyendidzana ne kugadzabgwe kwenyu ku nlanda wenyu.

⁷⁷Ngoni dzenyu ngadzizhe kundili, kuti ndizo nditjile, ngobe nlayo wenyu i shatho yangu.

⁷⁸Banozwikudza ngababhatisiwe shoni, ngobe banoshaka kundilengudza nge bupitipiti, koga imi ndokumbula ngekwe milayo yenyu.

⁷⁹Thamani kuti ibabo banomutja bashandukile kundili, kuti ndizo bazibe milayo yenyu.

⁸⁰Moyo wangu ngausibong'we nlandu ngekwe milayo yenyu kuti ndizo ndisitongobhatisiwa shoni.

⁸¹Meya yangu inotshwigwa ngekwe jidzo lenyu, ndogalabgwe mu dama lenyu.

⁸²Mesho angu atjinyala ngolindila gadzabgwe kwenyu, ndobhuzwa nditi, “mowondinyaladza lini?”

⁸³Ndotjinga gukhwa le nkumbi we zhambi lili mu busi, ipapa ndisakatongokangang'wa milayo yenyu.

⁸⁴Apa nlanda wenyu adzikitadze kuswikila lini kene? Apa mowosumikilisa banondigwadzisa lini kene?

⁸⁵Banozwikudza bakanditshila makomba, bathu basingatobele nlayo wenyu.

⁸⁶Milayo yenyu yose inogalikabgwe ndodziyidziwa kusina tjandatjinya mundibhatshe!

⁸⁷Bakashokobe bandidusa mu shango, koga andizolasha milayo yenyu.

⁸⁸Mu ludo gwenyu gusingazunguzike musitole butjilo gwangu, kuti ndizo ndibhate milayo ye nlomo wenyu.

⁸⁹Yahwe bayapo nge kusingapele, dama lenyu lakadzikila kudzimu.

⁹⁰Kugalikabgwe kwenyu kodwilila kunoti ku zwizekugwana zose makathama shango, ngono yakadzikila.

⁹¹Nge ndaulo yenyu zwithu zwimile nasi, ngobe zwithu zose zoshingila imwi.

⁹²Ha nlayo wenyu wakabe usi shatho yangu, ndobe ndakafa ngolobgwa shamu kwangu.

⁹³Anditowofa ndakangang'wa milayo yenyu, ngobe makabiganyidzila butjilo gwangu ndiyo.

⁹⁴Ndiwenyu, munditjidze, ngobe ndakashaka milayo yenyu.

⁹⁵Babi bakandilalila kuti bandilobese, koga ndokumbula milayo yenyu.

⁹⁶Ndakabona bhelelo le ndizanyo yose, koga milayo yenyu ayina tjilizanyo.

⁹⁷Imi, ndoda milayo yenyu seni! Ndokumbula ngekwayo sikati lose.

⁹⁸Nlayo wenyu unonditjenjedza kupinda zwita zwangu, ngobe unogalila tjose nami.

⁹⁹Ndohwisisa kupinda badiyi bangu bose, ngobe milayo yenyu ndiyo gumbuludzo langu.

¹⁰⁰Ndohwisisa kupinda bakwegula, ngobe ndohwa milayo yenyu.

¹⁰¹Ndodziba makumbo angu mu zila dzose dzakabipa, kuti ndizo ndibhate dama lenyu.

¹⁰²Anditoshandukila ndaulo dzenyu, ngobe makandidiya.

¹⁰³Matama enyu anozipa tjini mu lulimi gwangu, anozipa kupinda butji gwe nyutji mu nlomo wangu!

¹⁰⁴Nge milayo yenyu ndowana kuhwisisa, ndizo ndobenga zila dzose dze manyepkhwa.

¹⁰⁵Dama lenyu luvone gwe makumbo angu, ne tjedza tje zila yangu.

¹⁰⁶Ndakatuna abuya akushingikadza, kulondolodza ndaulo dzenyu dzakayengemala.

¹⁰⁷Ndakadziyidzika kwazo, mundipe butjilo, imwi Yahwe, kuyendidzana ne dama lenyu.

¹⁰⁸Amutjilani zwipo zwangu zwe kukudza, imwi Yahwe, kakale mundidiye ndaulo dzenyu.

¹⁰⁹Ndodwilila ndakabhata butjilo gwangu nge luboko gwangu, koga anditokangang'wa nlayo wenyu.

¹¹⁰Babi bakandilukila gwanga, koga andizolashika mu milayo yenyu.

¹¹¹Milayo yenyu ndiyo lukata gwangu nge kusingapele kose, ndiyo shatho ye moyo wangu.

¹¹²Ndakashandulila moyo wangu mu kuhwa milayo yenyu nge kusingapele kose, kunoti ku bupelo.

¹¹³Ndobenga bathu bana moyo mibili, koga ndoda nlayo wenyu

¹¹⁴Ndimwi dizhilo langu ne tjivikili tjangu, ndogalabgwe mu dama lenyu.

¹¹⁵Idwani pandili imwi bashingi be bubi, kuti ndibhate milayo ye Ndzimu wangu.

¹¹⁶Mundibhatshe kuyendidzana ne kugadzabgwe kwenyu, kuti ndizo nditjile, kakale musindiletje abhatisiwa shoni mu kugalabgwe kwangu.

¹¹⁷Mundibhate, kuti nditjile ndidwilile ndina hanya nge milayo yenyu.

¹¹⁸Molasha bose banolashika mu milayo yenyu, ngobe butjakwani gwabo mwina we tjigu.

¹¹⁹Bose babi be shango mobatola se malala, ndizo ndoda milayo yenyu.

¹²⁰Mmbili wangu unotetemesiwa nge kumutja, ndotja kusumikilisa kwenyu.

¹²¹Ndathama kwakatambunuka nenge ndulamo, musindiletjedzele mu batshambilidzi bangu.

¹²²Gadzanibgwe nlanda wenyu kuti mowonthamila bubuya, musiletjedzele basina Ndzimu kuti banditshambilidze.

¹²³Mesho angu atjinyadziwa ngolindila jidzo lenyu, ne kuzhadzisika kwe kugadzabgwe kwenyu kwakalulwama.

¹²⁴Thamilani nlanda wenyu kuyendidzana ne ludo gwenyu gusingazunguzike, kakale mundidiye milayo yenyu.

¹²⁵Ndi nlanda wenyu, mundipe hwisiso, kuti ndihwisise milayo yenyu.

¹²⁶Tjabe tjibaka tjenyu imwi Yahwe, kuti mutole thambo, ngobe nlayo wenyu auzotobegwa.

¹²⁷Sa ikoku, ndoda milayo yenyu, kupinda golide, kupinda golide yakatjena.

¹²⁸Malebeswa ndolingisanya makumbo angu ne milayo yenyu yose, ndobenga zila imwe ne imwe ye manyepkhwa.

¹²⁹Milayo yenyu inotjenamisa, ndizo meya yangu inoilondolodza.

¹³⁰Petenuka kwe matama enyu kopa tjedza, kopa basi be tjimwe hwisiso.

¹³¹Ndofemeleka ndakazhaligwa, ngobe ndakashuba milayo yenyu.

¹³²Shandukilani kundili mundihwile ngoni, sekwa munogala muthamila ibabo banoda zina lenyu.

¹³³Tambunudzani miyendo yangu kuyendidzana nge dama lenyu, musitongoletja jinyo likandilaula.

¹³⁴Mundidzutunule mu tshambilidzo ye bathu, kuti ndizo ndilondolodze milayo yenyu.

¹³⁵Penyeselani nlanda wenyu buso gwenyu, kakale mundidiye milayo yenyu.

¹³⁶Mesho angu anowunga mishodzi, ngoti bathu abatolondolodza nlayo wenyu.

¹³⁷Makalulwama, imwi Yahwe, ne kusumikilisa kwenyu kwakalulwama.

¹³⁸Makabiga milayo yenyu mu ndulamo nenge mu kugalikabgwe kose.

¹³⁹Ndobhaika mu moyo nge shungu ngoti zwita zwangu zwokangang'wa matama enyu.

¹⁴⁰Kugadzabgwe kwenyu kwakalikiwa zubuyanana, ngono nlanda wenyu unokuda.

¹⁴¹Ndintukununu kakale ndolingigwa pasi, nenguba kwakajalo anditokangang'wa milayo yenyu.

¹⁴²Ndulamo yenyu i ndulamo isingapele, kakale nlayo wenyu ndiwo malebeswa.

¹⁴³Tshiyilo ne buyendasi zwakandizhila, koga milayo yenyu i shatho yangu.

¹⁴⁴Milayo yenyu yakayengemala nge kusingapele, mundipeni hwisiso kuti nditjile.

¹⁴⁵Ndomudana nge moyo wangu wose mundidabile, imwi Yahwe. Ndowolondolodza milayo yenyu.

¹⁴⁶Ndomulilila, munditjidze, kuti ndilondolodze milayo yenyu.

¹⁴⁷Ndobinduka busikwana ndilila ndishaka bhatsho, ndogalabgwe mu matama enyu.

¹⁴⁸Mesho angu anobe akalinga kutangila balindi be busiku, kuti ndikumbulukigwe kugadzabgwe kwenyu.

¹⁴⁹Ihwani hwi langu mu ludo gwenyu gusingazunguzike, Imwi Yahwe, mu kululwama kwenyu, tjengetani butjilo gwangu!

¹⁵⁰Ibabo banotobela bubi babo pejopejo, abateli pano ne nlayo wenyu.

¹⁵¹Ipapo imwi muli pejo, imwi Yahwe, ne milayo yenyu yose i malebeswa.

¹⁵²Ndakazwidiya mu milayo yenyu ntolo, kuti makaibiga nge kusingapele.

¹⁵³Lingani tshiyilo yangu munditjidze, ngobe andizokangang'wa nlayo wenyu.

¹⁵⁴Mundimile mu ndebeleko yangu mundidzutunule, tjengetani butjilo gwangu kuyendidzana ne kugadzabgwe kwenyu!

¹⁵⁵Jidzo aliteli pano ne babi, ngobe abatoshaka milayo yenyu.

¹⁵⁶Kukulu ngoni dzenyu, imwi Yahwe, munditjidze kuyendidzana ne ndulamo yenyu.

¹⁵⁷Zwita ne banondinyanyayidza banjinji nenguba kwakajalo, anditoshandukila milayo yenyu.

¹⁵⁸Ndolinga basingagalikebgwe, ashima, ngobe abatolondolodza milayo yenyu.

¹⁵⁹Bonani sekwandinoda milayo yenyu, londolodzani butjilo gwangu kuyendidzana ne ludo gwenyu gusingazunguzike.

¹⁶⁰Matama enyu wose malebeswa, ndulamo ye ndaulo dzenyu dzose imile nge kusingapele.

¹⁶¹Bakololo be bushe banondisumikilisila kusina, koga moyo wangu unotja matama enyu.

¹⁶²Ndoshathila dama lenyu, se nthu wawana thundu yatapiwa ku ngwa.

¹⁶³Ndobenga kakale ndoshima manyepkhwa, koga ndoda nlayo wenyu.

¹⁶⁴Ndomukudza katendeka nge zhuba, ngekwe ndaulo dzenyu dzakalulwama.

¹⁶⁵Banoda nlayo wenyu bana kunyalala kukulu, akuna tjinobakutha.

¹⁶⁶Ndakalindila jidzo lenyu, imwi Yahwe, ngono ndoshingikadza milayo yenyu.

¹⁶⁷Ndohwa milayo yenyu, ndoyida kupindisisa.

¹⁶⁸Ndohwa milayo ne ndaulo dzenyu, ngobe zila dzangu dzose modziziba.

¹⁶⁹Imani tjililo tjangu tjiswike kumuli, imwi Yahwe. Mundipe hwisiso kuyendidzana ne dama lenyu.

¹⁷⁰Mitembezelo yangu ngaiswike mbeli kwenyu mundisunungule kuyendidzane ne kugadzabgwe kwenyu.

¹⁷¹Nlomo wangu unowomukudza kunjinji, ngobe mondidiya milayo yenyu.

¹⁷²Lulimi gwangu gowomba ngekwe kugadzabgwe kwenyu, ngobe milayo yenyu yose yakalulwama.

¹⁷³Luboko gwenyu ngagugale gwakazwilulwamisila kundibhatsha, ngobe ndolondolodza milayo yenyu.

¹⁷⁴Ndina nyota ye jidzo lenyu, imwi Yahwe, ngobe nlayo wenyu i shatho yangu.

¹⁷⁵Tshene munganditjidza kuti ndizo ndimukudze, ne ndaulo dzenyu dzindibhatshe.

¹⁷⁶Ndakamila ndonga pkhwizi yakalashika, shakani nlanda wenyu, ngobe anditokangang'wa milayo yenyu.