Read Kalanga Njimbo 132 Bible Online

Njimbo 132 - Kalanga bible

Njimbo 132

¹Imwi Yahwe, kumbulukigwani kuma na Dafite mu mang'oni wose aakadzikitadzila.

²Sekwa akatuna kuna Yahwe kakale kagadzabgwe Ndzimu Masimbawose wa Jakubo,

³“Anditowongina mu ng'umba yangu kene aizela mu bulalo gwangu,

⁴anditowo tongowanisa mesho angu hwope kene kuli kutshumwayila,

⁵kudzina ndiwanila Yahwe bugalo, bugalo gungagagwa ndiwo Ndzimu Masimbawose wa Jakubo.”

⁶Takahwilila ngekwako mu Efurata tikakuwana mu shango ye Jaa.

⁷“Ngatiyendeni ku bugalo gwawo. Ngatiunamateni pa tjigalo tje makumbo awo.”

⁸Milikani, imwi Yahwe, muyende ku bunyatutukilo gwenyu imwi ne Bhokisi le Tjidumano tje simba lenyu.

⁹Bapirisiti benyu ngabaambadziwe nge ndulamo, bagalimoyo benyu ngabapululudze.

¹⁰Ngekwa Dafite nlanda wenyu musitongo lamba nzhodziwa wenyu.

¹¹Yahwe bakatunila Dafite nge malebeswa kwabasingake bakakushandukila beti, “Mmwe we zwizekugwana zwizo, ndowon'gadza pa tjigalo tjitjo tje bushe.

¹²Ha bakololo babo bangalondolodza tjidumano tjangu ne milayo yandinowobadiya iyo, bakololo babo nge kusingapele, banowogala mu tjigalo tjitjo tje bushe, nge kusingapele kose.”

¹³Ngobe Yahwe bakashalula Ziyoni, bakaiyemulila kube bugalo gwabo.

¹⁴“Ogu ndigo bugalo gwe bunyatutukilo gwangu nge kusingapele kose, ndowogala ipapa, ngobe ndakapada.

¹⁵Ndowopakombolela kwazo nge zojiwa zwapo, ndowogutsha bashayi bapo nge tjiwunga.

¹⁶Bapirisiti bapo ndowobaambadza nge jidzo, ne bagalimoyo bapo banowopululudza.

¹⁷Ipapo ndowomedza lunyanga gumilile Dafite, ndakalulwamisila nzhodziwa wangu luvone.

¹⁸Zwita zwizwe ndowozwibhatisa shoni koga munli, tjiala tje nsholo uwe tjowongadzima.”