Read Kalanga Njimbo 135 Bible Online

Njimbo 135 - Kalanga bible

Njimbo 135

¹Kudzani Yahwe! Kudzani zina la Yahwe, mubakudze, imwi balanda ba Yahwe,

²imwi bamile mu ng'umba ya Yahwe, mu misha ye ng'umba ye Ndzimu wedu.

³Kudzani Yahwe, ngobe Yahwe bakalulwama, mbilani zina labo njimbo dzinobakudza, ngobe bana ngoni.

⁴Ngobe Yahwe bakazwishalulila Jakubo, iye Iziraela kube fumwa yabo.

⁵Ngobe ndoziba kuti Yahwe bankulukulu, She wedu upezhugwi kwe midzimu yose.

⁶Tjimwe ne tjimwe Yahwe tjabanoda thama banotjithama, kudzimu ne mu shango, mu makungwa ne kusi tjose kwe vula.

⁷Ndibo banothama kuti makole amilidze ku phelelo dze shango, banothama lipenyo gwe vula bebe bedusa phepo mu mabiganyilo abo.

⁸Ndibo bakabulaya mbano dze Baegipiti dzose dze bathu ne dze phuka

⁹bakazhisa zwilakidzo ne matjenamiso pakati kuko, iwe Egipiti, muna Faro ne balanda babe bose.

¹⁰Bakalobesa zwitjaba zwinjinji bakabulaya bomambo bakasima,

¹¹Sihoni, mambo we Bamori, na Ogo, mambo we Bhashani, ne mibuso yose ye Kanana,

¹²bakakoba shango yabo kube lukata lukata gwe bathu babo Baiziraela.

¹³Zina lenyu, imwi Yahwe, limile nge kusingapele, tjilumbi tjenyu, imwi Yahwe, tjoswika ku zwizekugwana zose.

¹⁴Ngobe Yahwe banowogwila bathu babo, kakale banowohwila ngoni balanda babo.

¹⁵Midzimu ye zwitjaba i siliva ne golide, yakathamwa nge bathu nge maboko

¹⁶Ina milomo koga ayitolebeleka, ina mesho koga ayitobona,

¹⁷ina zebe koga ayitohwa, kakale ayina meya mu milomo yawo.

¹⁸Ibaba banoyithama na bose banoigalabgwe banowonga iyo.

¹⁹Imwi ng'umba ye Iziraela, kudzani Yahwe! Imwi ng'umba ya Aroni, kudzani Yahwe!

²⁰Imwi ng'umba ya Levi, kudzani Yahwe! Imwi banotja Yahwe, kudzani Yahwe!

²¹Ngakukudziwe Yahwe mu Ziyoni ibo bagele mu Jerusalema. Kudzani Yahwe.