Read Kalanga Njimbo 139 Bible Online

Njimbo 139 - Kalanga bible

Njimbo 139

¹Imwi Yahwe, makandishakisisa mukabuya mukandiziba.

²Moziba ha ndigala pasi ne ndimilika, moziba njalakang'wa dzangu kutji kule kule.

³Moshakisisa zila yandinotobela ne pandinolala, kakale moziba zila dzangu dzose.

⁴Ne dama lisathu likabe mu nlomo wangu, imwi Yahwe, moliziba nge buzhalo.

⁵Makandipoteleka mbizho dzose, kakale mobiga luboko gwenyu pezhugwi kwangu.

⁶Luzibo gwenyu gonditjenamisa kwazo, gupezhugwi kwazo kupinda hwisiso yangu.

⁷Apa ndingayenda ngayi kutizha Meya yenyu kene? Kene ndingayi kwandingatizhila buso gwenyu?

⁸Ha nditathila pezhugwi, muyapo ikoko, ha ndithama bulalo gwangu mu gomba le lufu muyapo ikoko.

⁹Ha ndibinduka mangwanana ndinogala ku phelelo tjose dze gungwa,

¹⁰na ikokobo luboko gwenyu gowonditungamila, kakale luboko gwenyu gwe luji gowondibhata.

¹¹Ha nditi, “Tjoselele zhalima lowondifukidza, ne tjedza tjakandipoteleka tjikabe busiku,”

¹²na ilo zhalima alitelili zhalima kumuli, busiku gopenya se masikati, ngobe zhalima longa tjedza kumuli.

¹³Ngobe ndimwi makabumba zwimukati kwangu, makandiluka mundibhatshanya ndili mu tjibumbilo tja mme yangu.

¹⁴Ndomukudza ngobe ndakabumbgwa nge zila inotjisa kakale inotjenamisa. Mishingo yenyu inotjenamisa, woko ndokuziba zubuyanana.

¹⁵Mbumbiko yangu yakabe isakamusumbikalila, pandakabe ndibumbiwa pakasumbikala, ndilukiwa mu ntumbu we shangu.

¹⁶Mesho enyu akabona lopa langu lisathu likabumbiwa. Mu lukwalo gwenyu kwakabe kwakakwagwa, mazhuba wose andakabigigwa, ngono kusina lawo lathu likabepo.

¹⁷Njalakang'wa dzenyu dzakalulwama seni, imwi Ndzimu! Bunji gwadzo gungapani kene!

¹⁸Ndogwisa kudzibala, dzinji kupinda nsetje, ndozha ku bupelo, nditjinamwi.

¹⁹Ha mabe mungabulaya babi, imwi Ndzimu, ibo bana nyota ye tebula malopa badwe pandili,

²⁰ibabo banomugongobola, kakale bezwikudza beleba bubi nge kwenyu!

²¹Apa anditobenga ibabo banomubenga kene imwi Yahwe? Apa anditoshima ibabo banomumukila kene?

²²Ndobabenga nge lubengo gupatjena, ndobatola bali zwita zwangu.

²³Mundishakisise, imwi Ndzimu, mubuye muzibe moyo wangu, mundilike mubuye muzibe njalakang'wa dzangu.

²⁴Mubone kene kuna imwe zila mbiimbi imu ndili, ngono munditungamile mu zila nge kusingapele kose.