Read Kalanga Njimbo 141 Bible Online

Njimbo 141 - Kalanga bible

Njimbo 141

¹Ndodana imwi Yahwe, tjimbidzani muzhe kundili, teedzani hwi langu ha ndimudana.

²Ntembezelo wangu ngaunge motsha unonuhwa zwinozipa mbeli kwenyu ne kumilidza maboko angu kunge tjibhayilo tje madekwana.

³Mubige nlisi pa nlomo wangu, imwi Yahwe, galani makalisa zhuka kwe nlomo wangu.

⁴Musitongoshandulila moyo wangu ku bubi kene guli gupi, kwandinganginikana ne mishingo mibi, ndashanganyila ne bashingi be zwibi musindiletje aja mizipo yabo.

⁵Imani nlulwami andilobe, n'galimoyo andikumbuludze. Mafuta e babi ngaasizhodziwe mu nsholo wangu, ngobe ntembezelo wangu unogwa misi yose ne mishingo yabo mibi.

⁶Ha batjilongwa mu maboko a ibabo banowobasumikilisa, ndiko kwabanowoziba kuti matama a Yahwe malebeswa.

⁷Se bgwe linokwamugwa likapkhwanyikila pasi, ndiko mafupa abo sekwa kwaanowoandamisiwa pa nlomo we gomba le lufu.

⁸Koga mesho angu akalinga kumuli, imwi Yahwe, She wangu, ndoshaka dizhilo mu muli, musindiletjedze ndifa.

⁹Mundibakilile mu gwanga gwabakandilukila, ne mu bhuzha le bashingi be bubi.

¹⁰Babi ngabawile mu makwanga abo, imi ndipudzumuke!