Read Kalanga Njimbo 143 Bible Online

Njimbo 143 - Kalanga bible

Njimbo 143

¹Ihwani ntembezelo wangu, imwi Yahwe, munditeedze nge zebe mukugalikabgwe kwenyu, mundidabile mu ndulamo yenyu.

²Musisumikilise nlanda wenyu, ngobe akuna iye unotjila wakalulwama mbeli kwenyu.

³Ngekuti tjita tjakanditobelela, tjakandibumbuludza mu mavu, tjikandigadza mu zhalima sa ibabo bakafa ntolo.

⁴Ndabe pejo ngekuzwitoboka, ndotjilungayila koga.

⁵Ndokumbula mazhuba a ntolo ndoalakana ngekwe mishingo yenyu. Kozha mu nkumbulo wangu mishingo ye maboko enyu.

⁶Ndomilidzila maboko angu kumuli, meya yangu ina nyota nge kwenyu sa pasi pakawoma.

⁷Mundidabile tjinyolotjo imwi Yahwe, ndopela meya. Musindisumbikile buso gwenyu, ndingadwa ndinga ibabo banowila mukati kwe gomba.

⁸Ngandihweni ludo gwenyu gusingazunguzike mu mangwanana, ngobe ndogalabgwe mu muli. Mundidiye se kwandakafanila yenda, ngobe ndomilidzila meya yangu kumuli.

⁹Mundiangule mu zwita zwangu, imwi Yahwe, ndatizhila kumuli dizhilo.

¹⁰Mundidiye kuthama kuda kwenyu, ngobe mu Ndzimu wangu. Meya yenyu yakalulwama inditungamile, mu zila yakalizalizana.

¹¹Ngekwe zina lenyu, imwi Yahwe, biganyidzani butjilo gwangu. Mu ndulamo yenyu mu ndiduse mu tshiyilo.

¹²Mu ludo gwenyu gusingazunguzike lobesani zwita zwangu, kakale mulobese bose banondigwisa, ngobe ndi nlanda wenyu.