Read Kalanga Njimbo 144 Bible Online

Njimbo 144 - Kalanga bible

Njimbo 144

¹Ngakukudziwe Yahwe, shongwe yangu, ibo banodiya maboko angu kugwa, ne zwinyala zwangu kugwa ngwa,

²Shongwe yangu kakale mbakililo yangu, mbako yangu yakasima kakale ntjidzi wangu, tjivikili tjangu, mubali ndowana dizhilo, imwi munothama kuti bathu babe pasi kwangu.

³Imwi Yahwe, nthu ini kwamungabe ne hanya naye, kene nthu we nyama ne lopa ini, wamungashwa munkumbula kene?

⁴Nthu unonga phepo mazhuba awe anonga ntutshi unopinda.

⁵Webani zhuzhugwi kwenyu Yahwe, ngono mudelukile pasi, kuthani matombo kuti athungayile bhulubusi.

⁶Penyesani lupenyo gubapaladze, tumidzilani misebe yenyu mubatate.

⁷Tambunudzani luboko gwenyu kudwa pezhugwi, munditjidze mundiangule mu vula dzina masimba, mu maboko e bataya,

⁸be milomo inoleba manyepkhwa, ne maboko abo e luji aana malebeswa.

⁹Ndowomumbila lumbo gutshwa, imwi Ndzimu ndowomulidzila dende le misungo ili gumi,

¹⁰Imwi munopa bomambo kukunda. Imwi munogwila nlanda wenyu Dafite.

¹¹Mundigwile mu thumo lisina ngoni, kakale mundiangule mu maboko e bataya, be milomo inoleba manyepkhwa, kakale maboko abo e luji aana malebeswa.

¹²Dzene bakololo bedu mu butjetjana gwabo banganga miti yakakula kwakapelela. Bakololokadzi bedu bange phanda dze ndzibo, dzakatemegwa mbako ye ng'umba ye bushe.

¹³Dzene matula edu angazhala, azhadziwe nge zwilimwa zwakasiyasiyana, dzene pkhwizi dzedu dzingazwala dzikabe zwiwulu, dzikabe makumi e zwiwulu mu mafulo edu,

¹⁴dzene mangabe angasima kakweba ntolo unolema, kuti kusitongobe ne ungathukila kene unotapiwa, ngakusibe ne tjililo tje kuhwa zogwadza mu mikoto yedu!

¹⁵Kwakashatha ibabo bathu banokombolegwa kwakajalo. Kwakashatha bathu banotola Yahwe bali Ndzimu wabo!