Read Kalanga Njimbo 145 Bible Online

Njimbo 145 - Kalanga bible

Njimbo 145

¹Ndowomukudza, Ndzimu wangu kakale mambo wangu, ngono ndowokudza zina lenyu nge kusingapele kose.

²Zhuba ne zhuba ndowomukudza. Ndowokudza zina lenyu nge kusingapele!

³Yahwe bankulukulu kakale bakafanila kudziwa kukulu kwazo, bukulu gwabo agutolondeka.

⁴Tjizekugwana tjimwe tjowokudza mishingo yenyu kunoti ku tjimwe ngono banowoleba ngekwe bukulu gwe mishingo yenyu.

⁵Mu bubuya ne bukulu gwe mbuso wenyu, ngekwe mishingo yenyu inotjenamisa, akutowondidwa mu moyo.

⁶Bathu banowosumikila ngekwe mishingo yenyu inotjenamisa ngono ndowoleba ngekwe bukulu gwenyu.

⁷Banowolumbidza ngekwe kuandama kwe bululwami gwenyu, kakale banombila pezhugwi ngekwe ndulamo yenyu.

⁸Yahwe bana ngoni ne lubu, abatotjimbidza gwadzamoyo kakale ludo gwabo nde gusingazunguzike.

⁹Yahwe bakalulwamila bose, kakale mahwilongoni abo amuna zose zwabakathama.

¹⁰Mishingo yenyu yose inowoboka, imwi Yahwe, kakale bagalimoyo benyu bose banowomukudza.

¹¹Banowoleba ngekwe gudzo le bushe gwenyu, bebuya beleba ngekwe simba lenyu,

¹²kuzibisa bathu bose ngekwe mishingo yenyu mikulu, ne gudzo le bubuya gwe bushe gwenyu.

¹³Bushe gwenyu bushe gusingapele, nenge ndaulo yenyu imile kuswikila zwizekugwana zose. Yahwe banogalikabgwe mu matama abo wose, kakale bana ngoni mu mishingo yabo yose.

¹⁴Yahwe banosimisa bose ibabo banowa, kakale banomisa nge makumbo bose bakatemeka mafupa.

¹⁵Mesho abose akalinga kumuli, ngono mobapa zojiwa zwabo nge nsi wakalingisana.

¹⁶Mofumbatunula tjiazha tjenyu, mugutsha njemulo dze zose zwinotjila.

¹⁷Yahwe bakatambunuka mu zila dzabo dzose, kakale bana moyontjena muna zose zwabakathama.

¹⁸Yahwe bapejopejo na bose ibabo banobadana, kuna bose banobadana nge malebeswa.

¹⁹Banoshingikadza njemulo dza bose ibabo banobatja, kakale banohwa zwililo zwabo, ngono banobatjidza.

²⁰Yahwe banotjengeta bose ibabo banobada, koga banowolobesa babi bose.

²¹Nlomo wangu unowogala ukudza Yahwe, ne bathu bose ngabakudze zina labo lakayengemala nge kusingapele kose.