Read Kalanga Njimbo 147 Bible Online

Njimbo 147 - Kalanga bible

Njimbo 147

¹Kudzani Yahwe! Kwakanaka seni kumba njimbo dzinokudza Ndzimu wedu, ngobe una ngoni, kakale lumbo gunobakudza gobafanila!

²Yahwe banobaka Jerusalema, banokubunganya Baiziraela bakabe batapiwa.

³Banopodza be mimoyo yakapaluka, kakale banosunga mabanga abo.

⁴Banolaula mbalo ye nyenyedzi, banodzitumila mazina adzo dzose.

⁵She bedu bankulu kwazo, kakale bana masimba makulu, hwisiso yabo ayina tjilizanyo.

⁶Yahwe banomilidza banozwiyisa pasi, Yahwe banoposela babi pasi.

⁷Mbilani Yahwe nge mboko, thamilani Ndzimu wedu nlidzo unozipa nge tjilidzo tje laya!

⁸Yahwe banofukidza zhuzhugwi nge makole, banonisa vula mu shango, banomedza bushwa mu matuthu.

⁹Banopa phuka zojiwa zwadzo, ne majindana e makungubo ha elila.

¹⁰Nzhazho wabo aute uli mu masimba e mbizi, kene shatho yabo aite ili mu lubilo gwe nlabuki.

¹¹Koga Yahwe banoshathila ibabo banobatja, muna banogalabgwe ludo gwabo gusingazunguzike.

¹²Kudza Yahwe, iwe Jerusalema! Kudza Ndzimu uwo, iwe Ziyoni!

¹³Ngobe banosimisa mazhalilo e mikoba iyo, banokombolela bathu ba mukuli.

¹⁴Banokupa kunyalala mu migathu iyo, banokugutsha nge korong mbuyanana.

¹⁵Banotumilila ndaulo yabo mu shango, dama labo lolabuka lilibilidza.

¹⁶Banozhisa kapuku tjinonga wulu, banoandamisa makaa se nlota.

¹⁷Banoposela tjivulamabgwe pasi se mamburumburu, apa ndiani ungamilila butotho gwabanozhisa kene?

¹⁸Banotuma dama labo, ngono bakazwinyausa, banothama phepo yabo ikawuwudza, ne vula dzikawunga!

¹⁹Banoleba dama labo kuna Jakubo, milayo yabo ne ndaulo bakazwipa Iziraela.

²⁰Akuna tjimwe itjaba tjabakatongothamila sa ikoko, abatoziba milayo yabo. Kudzani Yahwe!