Read Kalanga Njimbo 17 Bible Online

Njimbo 17 - Kalanga bible

Njimbo 17

¹Ihwani kukumbila kwakatambunuka Yahwe, teedzani tjililo tjangu, hwililani ntembezelo unodwa mu nlomo usina bupitipiti.

²Kusheta nlandu kwangu ngakulakidziwe ndimwi, mesho enyu ngaabone tjakalulwama.

³Ha mungashola moyo wangu, ha mungandikumba busiku, ha mungandilika, mowowana kusina bubi mundili, nlomo wangu awutotjuluka nlayo.

⁴Ngekwe mishingo ye bathu, nge dama lenyu ndakaleya zila dze bakukutu.

⁵Makumbo angu anolambila mu zila yenyu, andithu atongopambuka muili.

⁶Ndodana imwi Ndzimu ngoti imwi mowondidabila, munditeedze, muhwe matama angu.

⁷Lakidzani ludo gwenyu gunotjenamisa, Imwi ntjidzi wa ibabo banoshaka dizhilo, betizha zwita zwabo.

⁸Munditjengete se shanga ye zhisho; mundisumbike mu ntutshi we mapapilo enyu,

⁹mundisumbikile babi banondigwisa, zwita zwangu zwisingatje kubulaya zwandipoteleka.

¹⁰Banokukutadza mimoyo yabo kuti basibe ne ngoni; Milomo yabo inolebeleka nge kuzwikudza.

¹¹Banondilonda, bakandipoteleka sangwenu; banoshaka sekwa bangandiligila pasi.

¹²Banonga shumba inoshaka kuzandabula tjainobhata, se shumbana ilelile mu ishakana.

¹³Milikani Yahwe, igwani ne zwita zwangu muzwikunde. Mundiangule nge thumo mu babi.

¹⁴Yahwe mundiangule mu bathu be shango ino, mbhailo wabo i shango ino. Mubalobe nge shamu yamakababiganyidzila, bana babo bawane inopinda tjilizanyo, basiyile bana babo.

¹⁵Koga imi nge kwangu, ndowobona tjiso tjenyu mu ndulamo; Ndowoti ndimuka ndowoshathila kuti muyapo.