Read Kalanga Njimbo 18 Bible Online

Njimbo 18 - Kalanga bible

Njimbo 18

²Yahwe ndibo simba langu, ndibo dizhilo langu. Ndzimu wangu, ndibo dizhilo langu landinotizhila kulili, tjivikili tjangu, simba le jidzo langu, bhakasa langu.

³Ndodana Yahwe, ibo bakafanigwa ngokudziwa, ngono ndatjidziwa mu zwita zwangu.

⁴Misungo ye lufu yakandipomba, maphatjaphatja e golomodzo akandikulila.

⁵Mitjili ye ikumbu yakandipomba, mapuzhu e lufu ambeli kwangu.

⁶Mu kudziyidzika kwangu ndakadana Yahwe; Ndakalilila ku Ndzimu wangu kuti undibhatshe. Mu Ng'umba yawo kahwa hwi langu. Tjililo tjangu tjikaswika mu zebe dzidze.

⁷Ndizo shango yakazunguzika ikatengenyeka, thiwabo dze matombo dzikazunguzika, ngoti Ndzimu wakabe wagwadzamoyo.

⁸Busi gukathungayila mu zwimilo zwawo, moto unopisa ukadwa mu nlomo wawo, masimbe anothuta kadwa muuli.

⁹Ukapalula zhuzhugwi ukadelukila pasi, makole matema alikusi kwe makumbo awo.

¹⁰Ukatatha tjerubhu ukawuluka, ukazha nge lubilo mu mapapilo e phepo.

¹¹Ukazwizwimba nge zhalima; makole matema e vula akamandana akaupoteleka.

¹²Mu lupenyo gwakabe guli mbeli kwawo, tjivulamabgwe ne masimbe e moto zwikapubulidza makole.

¹³Yahwe kakale bakadadamula bali kuzhuzhugwi, Upezhugwi zhugwi kadusa hwi lile ne tjivulamabgwe ne moto.

¹⁴Bakaposa misebe yabo bakapaladza zwita zwabo, bakapenyesa lupenyo gwe vula bakazwipaladza.

¹⁵Ludondo gwe gungwa gukaboneka, ne thiwa dze shango dzikabe patjena, Yahwe ha mutjemela, nge bushongola gwenyu.

¹⁶Bakaabilila kudwa zhuzhugwi bakanditola, bakandidubula mu vula yakangina.

¹⁷Bakandiangula mu tjita tjangu tjakasima, ne muna ibabo banondibenga, ngoti bakabe bakandikunda.

¹⁸Ndakati ndakasimigwa, bakandigwisa, koga Yahwe bakandiangula.

¹⁹Bakandiyisa mu magalo akatalabuka, bakandiangula ngoti bakandishathila.

²⁰Yahwe banondipa mbhayilo kuyendidzana nge ndulamo yangu, banondibuzila kuyendidzana nge mishingo yangu.

²¹Ndakalondolodza zila dza Yahwe, andizothama mbipo ngofupatila Ndzimu.

²²Ndayo dzabo dzose dzakanditungamila, ne ndaulo dzabo andizodzikupila kutjena.

²³Ndakasibe ne nlandu mbeli kwabo, ndakazwidziba mu jinyo.

²⁴Yahwe bakandipa mbhayilo kuyendidzana nge ndulamo yangu kuyendidzana ngekusabe nge nlandu kwangu.

²⁵Kuna banogalikabgwe molakidza kugalikabgwe, kuna basina nlandu molakidza kusheta nlandu,

²⁶kuna bakatjenapala mozwilakidza makatjenapala, kuna bakakombama muna bushongola.

²⁷Motjidza banozwiyisa pasi, koga banozwikudza mobabhatisa shoni.

²⁸Imwi Yahwe ndimwi munothutisa luvone gwangu. Ndzimu wangu unoshandula zhalima langu kube tjedza.

²⁹Nge simba lenyu ndothasela babhayani, ha ndina Ndzimu wangu ndotjuluka guma.

³⁰Ndzimu iwoyu zila dzawo dzakalulwama seni, kugadzabgwe kwa Yahwe ku malebeswa, tjivikili tja bose banotizhila ku bali.

³¹Ndzimu ndiyani ha isi Yahwe? Shongwe ndiyani ha isi Ndzimu wedu.

³²Ndzimu ndiwo unondipa masimba, ndiwo unothama zila yangu ikasibe ne mbatsha.

³³Wakathama makumbo angu kanga makumbo e zilawa, wakandibiga pakagadzikana pezhugwi.

³⁴Unodiya zwiazha zwangu kugwa, kuti ndizo maboko angu angapeta dati le phangula.

³⁵Mondipa tjivikili tje jidzo lenyu, ne luboko gwenyu gwe luji gwakanditjengeta, bhatsho yenyu yakandithama nkulu.

³⁶Makatalabudza pamile makumbo angu, kuti ndizo makumbo angu asitongosodzoloka.

³⁷Ndakatatana ne zwita zwangu azwibhata; Andizoshanduka kuswikila zwapela.

³⁸Ndakabatemela pasi bakasitjatubule kumuka, bakawila pasi kwe makumbo angu.

³⁹Makandipa masimba e kugwa, mukathama kuti zwita zwangu zwindithigamile.

⁴⁰Mothama kuti zwita zwangu zwinditizhe, na ibabo banondibenga ndobalobesa.

⁴¹Bakalila beshaka bhatsho, koga akuna wakababhatsha. Bakanodana Yahwe koga abazobadabila.

⁴²Ndobakwiya bakasala benga hwuluba inowulusiwa nge phepo. Ndobatebula se dope le zila.

⁴³Makandigwila mu bathu be bapanduki. Makandithama ntungamili we zwitjaba; bathu bandakabe ndisingazibe banondishingila.

⁴⁴Tjinyolotjo ha ndilebeleka banondihwa. Bataya banondithigamila.

⁴⁵Bataya bakatemeka mafupa, banozha betetema bebhuda mu matizhilo abo.

⁴⁶Yahwe banotjila! Ngakukudziwe shongwe yangu, ngakulumbidziwe Ndzimu we jidzo langu,

⁴⁷iwo Ndzimu wakandibgwilizilila ukaisa tjaba pasi kwangu,

⁴⁸ukandigwila mu zwita zwangu. Wakandikudza kupinda zwita zwangu, ukandidusa mu phipiti ukandiangula mu bathu banoda phipiti.

⁴⁹Ndizo wali ndowomukudza pakati kwe zwitjaba imwi Yahwe, amba njimbo dzinokudza zina lenyu.

⁵⁰Yahwe unopa mambo uwe kukunda, bakalakidza nzhodziwa wabo ludo gusingapele, iye Dafite ne ludzi gugwe.