Read Kalanga Njimbo 19 Bible Online

Njimbo 19 - Kalanga bible

Njimbo 19

¹Mazhuzhugwi anoleba bukulu gwe Ndzimu, zhiyendakuyenda lolakidza mishingo ye maboko awo.

²Zhuba lolebeleka libudza limwe, busiku golakidza gumwe zibo.

³Akuna ndebeleko kene matama, akuna pasingahwike nsindo wazo.

⁴Nsindo wazo unobhudila mu shango yose, matama awo anohwika ku phelelo dze shango. Ndzimu wakabakila zhuba nshasha mu ali,

⁵ilo linobhuda se nkwasha ebhuda mu ng'umba iye, lolabuka mu zila yalo lakashatha se nlume wakasima.

⁶Lobhuda mu lubizho gumwe gwe shango, likayenda likanomilila ku gumwe. Akuna tjakabgwatila kupisa kwalo.

⁷Nlayo wa Yahwe uzhele, unomusidzila meya. Ndaulo dza Yahwe dzogalikabgwe, dzotjenjedza basakatjenjela.

⁸Milayo ya Yahwe ina malebeswa, inoshathisa moyo. Ndaulo ya Yahwe yakatjena, inozhula mesho.

⁹Kutja Ndzimu kubuyanana, kugele nge kusingapele. Milayo ya Yahwe yakatambunuka, yakalulwama.

¹⁰Inodika kupinda golide, Inozipa kupinda butji gwe nyutji gudotha mu mape.

¹¹Nlanda wenyu unotjenjedziwa ndiyo, kuyilondolodza kuna mbuzilo hwulu.

¹²Koga apa ndiyani ungabona milandu iye kene? Mundizwiibhatigwe milandu yakasumbikika.

¹³Mundidzibe mu matjinyo e mwaza, musialetje akandilaula. Ndizo ndowolulwama tjose, ndowobe ndasununguka mu kutjuluka nlayo.

¹⁴Matama angu nenge njalakang'wa dzangu ngadziamutjilike kumuli, imwi Yahwe dizhilo langu, Ndzutunuli wangu.