Read Kalanga Njimbo 2 Bible Online

Njimbo 2 - Kalanga bible

Njimbo 2

¹Ini zwitjaba zwilangana, ne bathu banolukilani tjishwe suli?

²Bomambo be shango bakazwimisa zubuyanana, ne babusi banokumbuludzana, kumukila Yahwe ne Nzhodziwa wabo beti,

³“Ngatithubuleni mitjili yabo, tiduse misungo yabo mu tili.”

⁴Iye ugele mu tjigalo tje bushe kudzimu unoseka; Yahwe banobaseka maanya.

⁵Ndizo banowolebeleka nabo mu bushongola gwabo, bakabatjisa mu kugwadzamoyo kwabo,

⁶beti, “Ndakabiga mambo wangu pezhugwi kwe Ziyoni, dombo langu lakayengemala.”

⁷Ndowoleba patjena tjakalebgwa ndi Yahwe, bakati kundili, “Unkololo wangu, nasi ndabe tate babo.

⁸Undikumbile, ndowokupa zwitjaba zose zwikabe thaka iyo, ne mbizho dze shango dzowobe dzidzo.

⁹Unowobapkhwanya nge swimbo ye tshipi, ukabapkhwanya se zwiyenga zwe jegwa.”

¹⁰Ndizo ngwenu, imwi bomambo, tjenjelani; Ndomuluma zebe, imwi balauli be shango.

¹¹Shingilani Yahwe nge kutja, nge kuzwiyisa pasi.

¹²Iwani nge zwidwi mu namate Nkololo, asidwe egwadzamoyo, mube mulobesiwa mu zila dzenyu. Bakashatha bose banotizhila mu nli.