Read Kalanga Njimbo 22 Bible Online

Njimbo 22 - Kalanga bible

Njimbo 22

¹Ndzimu wangu, Ndzimu wangu, mandilashilani? Ini muli kule zwingapa nge kundibhatsha mu kuhwazogwadza kwangu kene?

²Ndzimu wangu, ndolila masikati, koga amutondidabila. Ndolila nenge busiku, anditonyaluluka.

³Koga makayengemala, tjigalo tjenyu tje bushe i gudzo le Iziraela.

⁴Bobatategulu bedu bakagalabgwe mu muli, bakagalabgwe mukabaangula.

⁵Bakalilila kumuli ngono bakatjidziwa, bakagalabgwe mu muli, ngono bakasibhakhwe nge shoni.

⁶Koga imi ndi gonye andite ndili nthu, ndolengudziwa nge bathu, ndosekiwa nge mmwe ne mmwe.

⁷Bose banondibona banondidadila, banondihwong'ola, bedzungudza misholo,

⁸beti, “Wakabiga muna Yahwe, Yahwe ngaban'gwile, ngaban'angulile, ngoti unoshathisiwa ndibo!”

⁹Koga ndimwi makandidusa mu ntumbu. Makanditjengeta nditji mu zhamu la mme yangu.

¹⁰Ndakamupiwa kudwa mu kuzwagwa kwangu. Makabe Ndzimu wangu kudwa pa kuzwagwa kwangu.

¹¹Musibe kule nami, ngoti mbatsha dzipejo, ngono akuna ungabhatsha.

¹²Mikono minjinji yakandikomba, mikono yakasima ye Bhashani yakandikombeledza.

¹³Inondiashamila yakazhula milomo yayo se shumbalume inobomba ikazandabula.

¹⁴Ndotebugwa se vula, mafupa angu wose akalungunuka; moyo wangu unonga phola, unonyawuka mukati kwe ifuba tjangu.

¹⁵Simba langu lapela, lulimi gwangu gonamatila mu bgwasha. Makandiladzika mu hwuluba ye lufu.

¹⁶Mbgwa dzakandikomba, goko le babi lakandikombeledza, bakabhaya maboko angu ne makumbo angu.

¹⁷Ndingabala mafupa angu wose. Bathu banondilingisisa bendinyenya.

¹⁸Banokobana zwiambalo zwangu tjekwabo bekandila kubona kuti upi unotola tjipi.

¹⁹Koga imwi Yahwe, musibe kule! Imwi bhatsho yangu, libilidzani kundiangulila!

²⁰Mundivikile thumo; gwilani butjilo gwangu mu simba le mbgwa.

²¹Mundiangulile mu shumba. Munditjidze mu nyanga dze nyati.

²²Ndowozibisa bakanyi kwangu zina lenyu, ndowomukudza pakati kwe gubungano.

²³Imwi banotja Yahwe! Mubakudze mose imwi bana ba Jakubo! Mubalumbidze mose imwi bana ba Iziraela!

²⁴Abazolingila pasi kene bakashinyata kudziyila kwe bakahwisiwa zogwadza, abazobasumbikila buso gwabo, koga bakahwa kukumbila bhatsho kwabo.

²⁵Kumukudza kwangu mu gubungano gulu kodwa mu muli. Ndowoshingikadza kutuna kwangu mu mesho aibabo banomutja.

²⁶Bashayi banowoja bakaguta, ibabo banoshaka Yahwe banowobakudza. Dzene bangatjila nge kusingapele!

²⁷Midzibo yose ye shango inowokumbula ikashandukila kuna Yahwe, ne njudzi dzose dzowobanamata.

²⁸Ngoti bushe ngegwa Yahwe, ngono banobusa zwitjaba.

²⁹Bose bafumi be shango banowothigama benamata. Bose be nyama ne lopa banowothigama mbeli kwabo.

³⁰Zwizekugwana zwinozha zowobashingila, Bathu banowoleba ngekwa She, bebudza zwizekugwana zwinowozha.

³¹Banowoleba ngekwe ndulamo ya She, ku zwizekungwana zwinowozwagwa ngobe She bakaithama.