Read Kalanga Njimbo 25 Bible Online

Njimbo 25 - Kalanga bible

Njimbo 25

¹Ndomilidzila meya yangu kumuli Yahwe.

²Ndzimu wangu, ndogalabgwe mu muli, musindiletje abhakhwa nge shoni. Musiletje zwita zwangu zwikazwikudza pezhugwi kwangu.

³Musiletjedze ibabo banogalabgwe mu muli bakabhakhwa nge shoni. Letjani ibabo bana yemula dze kutjebela ba bhakhwe nge shoni.

⁴Mundithame ndizibe zila dzenyu Yahwe, mundidiye zila dzenyu.

⁵Munditungamile mu malebeswa enyu, mundidiye, ngoti ndimwi Ndzimu we jidzo langu; Ndogalamoyo mu muli zhuba lose.

⁶Kumbulani ngoni dzenyu Yahwe, nenge ludo gwenyu gusingazunguzike, ngoti zwodwa kule zwili yapo.

⁷Musikumbule tjibi tje butjetjana gwangu, kene kutjuluka nlayo kwangu. Mundikumbule kuyendidzana nge ludo gwenyu gusingazunguzike, muthamila ndulamo yenyu Yahwe!

⁸Yahwe bakalulwama kakale bakatambunuka; ndizo banodiya batjinyi zila yabo.

⁹Banotungamila banozwiyisa pasi muna tjakalulwama. Banodiya banozwiyisa pasi kutobela zila yabo.

¹⁰Dzose zila dza Yahwe ludo ne kugalikabgwe, kuna banotobela tjidumano ne milayo yabo.

¹¹Ngekwe zina lenyu Yahwe, mundizwiibhatigwe kutjinya kwangu, ngoti kutjinya kwangu kukulu.

¹²Ndiani kene nthu unotja Yahwe? Banowon'diya zila yaakafanila shalula.

¹³Iye unowobhudilila mu butjilo, ne bana babe banowothuwa shango.

¹⁴Buzwalani gwa Yahwe gumuna banobatja ngono banobathama kuti bazibe tjidumano tjabo.

¹⁵Mesho angu anogala akalinga kuna Yahwe, ngoti banowodusa makumbo angu mu gwanga.

¹⁶Shandukilani ku ndili mundihwile ngoni, ngoti ndimu bushoma kakale ndadziyidzika.

¹⁷Kudziyidzika kwangu kwakula, mundiduse mu kuhwazogwadza kwangu.

¹⁸Lingani kudziyila kwangu ne kudziyidzika kwangu, ndizo mundizwiibhatigwe jinyo langu lose.

¹⁹Bonani kuti zwita zwangu zwingapani, nenge kuti bakandibenga kungapani.

²⁰Tjengetani butjilo gwangu, mundiangule, musindiletje abhatisiwa shoni, ngoti ndotizhila kumuli.

²¹Dzene malebeswa ne kutambunuka zwinganditjengeta, ngoti ndakalinga imwi.

²²Ndzimu, dzutunulani Iziraela, mu kudziyidzika kwayo kose.