Read Kalanga Njimbo 27 Bible Online

Njimbo 27 - Kalanga bible

Njimbo 27

¹Yahwe ndibo tjedza tjangu ne jidzo langu, ndiyani wandingatja kene? Yahwe ndibo dizhilo langu, ndingatja ani kene?

²Ha babi bendinginilila kuti bandibulaye, babengi bangu ne zwita zwangu, banowokuthiwa bakawa.

³Kene ndingakombiwa ne ngwa, anditowotja, kene ngwa ingandiwila, koga ndowobe ne kugalabgwe.

⁴Tjing'ompela tjithu tjandakakumbila kuna Yahwe, nditjo tjandinowovima. Wuti ndigale mu ng'umba ya Yahwe, mazhuba wose e butjilo gwangu, kubona bubuya gwa Yahwe ne kuzwidiya mu ng'umba yabo.

⁵Ngoti banowondisumbika mu bugalo gwabo mu zhuba le kudziyidzika, banowondisumbika mu tente yabo, banowondigadza pezhugwi kwe shongwe.

⁶Ndizo ndowomilidzika kupinda zwita zwangu zose kundipoteleka. Ndowodusa zwipo nge mpululu mu tente ya Yahwe. Ndowomba nge nlidzo wakanaka ndimbila Yahwe.

⁷Ihwani Yahwe ha ndimudana, mundihwile ngoni mundidabile!

⁸Moyo wangu nge kwenyu ukati, “Shaka buso gwabo!” Buso gwenyu Yahwe, ndigo gwandinoshaka.

⁹Musindisumbikile buso gwenyu. Musigwadzemoyo mukatata nlanda wenyu, imwi magala muli bhatsho yangu. Musindilashe, musindifupatile, imwi Ndzimu we jidzo langu.

¹⁰Kene tate na mme bangandilasha, Yahwe banowondiamutjila.

¹¹Mundidiye zila yenyu Yahwe, munditungamile mu zila yakatambunuka ngekwe zwita zwangu.

¹²Musiletje zwita zwangu zwikandithama kuda kwazo batendeki be manyepkhwa bakandimukila, mafemo abo anolakidza mbatsha kundili.

¹³Ndogalamoyo kuti ndowobona bubuya gwa Yahwe mu shango ye batjili.

¹⁴Galabgwe muna Yahwe sima, ukulumbidzike, galamoyo muna Yahwe.