Read Kalanga Njimbo 28 Bible Online

Njimbo 28 - Kalanga bible

Njimbo 28

¹Ndodana imwi Yahwe, shongwe yangu, musilambe kundihwa. Ha mungandinyalalila, ndowonga ibabo banongina mu gomba.

²Ihwani tjililo tjangu, ndililila kumuli ndishaka bhatsho, ndimilidzila maboko ku bugalo gwenyu gwakayengemala.

³Musindikakatile kuzhe ne babi, na ibabo bashingi be bubi, banoleba kunyalala ne babakidzani babo, koga mu mimoyo yabo kuna busada.

⁴Mubalipe kuyendidzana ne mishingo yabo, kuyendidzane ne mbipo ye mishingo yabo. Mubalipe kuyendidzana ne mishingo ye maboko abo. Mubape mbhayilo wakabalingisana.

⁵Ngobe abana hanya nge mishingo ya Yahwe, kene mishingo ye maboko abo, banowobalobesa bakasitjababumbe kakale.

⁶Yahwe ngabakudziwe, ngobe bakahwa kukumbila kwangu.

⁷Yahwe ndibo simba langu ne tjivikili tjangu, moyo wangu unogalabgwe mu bali. Ndizo ndobhatshiwa ne moyo wangu wakashatha, ndobakudza nge lumbo gwangu gwe kuboka.

⁸Yahwe ndibo simba le bathu babo, ndilo dizhilo linotjidza nzhodziwa wabo.

⁹Tjidzani bathu benyu, kombolelani thaka yenyu. Ibeni nlisi wabo, mubabhabhe nge kusingapele.