Read Kalanga Njimbo 31 Bible Online

Njimbo 31 - Kalanga bible

Njimbo 31

¹Ndotizhila ku muli Yahwe, musitongondiletja abhatisiwa shoni; munditjidze nge ndulamo yenyu.

²Mundihweni, mundigwile tjinyolotjo! Ibeni shongwe ye dizhilo langu, dizhilo lakasima kunditjidza.

³Ndimwi shongwe yangu ne dizhilo langu, ngekwe zina lenyu munditungamile, mundikwebe.

⁴Mundiduse mu gwanga gwandakasumbikigwa, ngoti ndimwi dizhilo langu.

⁵Meya yangu ndoyilonga mu maboko enyu. Makandidzutunula Yahwe, imwi Ndzimu unogalikabgwe.

⁶Ndobenga ibabo banokudza zwifano zwisina nshingo, koga imi ndogalabgwe muna Yahwe.

⁷Ndowoshatha apululudza ngekwe ludo gwenyu gusingazunguzike, ngoti makabona kudziyidzika kwangu, mukaziba tshiyilo yangu.

⁸Amuzondilonga mu maboko e tjita tjangu, makamisa makumbo angu pathu pakashaladuka.

⁹Ibeni ne ngoni nami Yahwe, ngoti ndimu kudziyidzika, mesho angu anyala ngolila, meya yangu ne mmbili wangu zwanyalabo.

¹⁰Butjilo gwangu gwashakadziwa ngohwa zogwadza, makole angu atapudziwa ngolila. Simba langu lopedziwa nge tshiyilo yangu, ne mafupa angu ashakala.

¹¹Ndi madado pakati kwe zwita zwangu ndotjisa ku babakidzani bangu. Ibabo banondibona mu dzizila banonditizha.

¹²Ndatjibhuda mu mikumbulo se nthu wakafa, ndatjinga tjija tjakapkhwanyika.

¹³Ee ndohwa banjinji benyebezela beti, kotjisa pamwe ne pamwe! Banolangana nge kwangu, belanganila kundibulaya.

¹⁴Koga ndomugalabgwe Yahwe, ndoti “Mu Ndzimu wangu.”

¹⁵Misi yangu imu maboko enyu; mundiangule mu maboko e zwita zwangu ne muna banondidziyidza.

¹⁶Buso gwenyu ngagupenyele nlanda wenyu; munditjidze mu ludo gwenyu gusingazunguzike.

¹⁷Musindiletje abhatisiwa shoni Yahwe, ngoti ndodana imwi. Letjani babi babhatisiwe shoni, ngabangine mu bugalo gwe bafi nge tjitu.

¹⁸Milomo inonyepa ngainyaladziwe, inozwikudza izwida, ilengudza balulwami.

¹⁹Ndulamo yenyu ihwulu seni, iyo yamakabigila ibabo banomutja, ya munothama mu mesho e bana be bathu, muthamila ibabo banotizhila ku muli.

²⁰Makabasumbika ngekubepo kwenyu, mubasumbikila ndangano dzakabipa dze bathu, makababakilila mu nshasha wenyu mubavikila milomo ina zwilebo.

²¹Yahwe ngabakudziwe, ngoti bakandilakidza ludo gwabo gunotjenamisa, mu tjibaka tjandakabe ndakakombiwa se nzi nkulu wakombiwa nge ngwa.

²²Ndakati ndapaluka moyo ati, “Ndatatigwa kutjena namwi.” Koga imwi mohwa tjililo tjangu, ha ndikumbila bhatsho yenyu.

²³Idani Yahwe imwi mose bayengemali! Yahwe banotjidza banogalamoyo, koga banobgwilizila nge buzhalo iye unozwikudza.

²⁴Simani, mube nge tjilopa, imwi mose makalindila Yahwe.