Read Kalanga Njimbo 33 Bible Online

Njimbo 33 - Kalanga bible

Njimbo 33

¹Shathani muna Yahwe imwi balulwami, gudzo lofanila bakatambunuka.

²Kudzani Yahwe nge dende, mubathamile nlidzo nge tjilidzo tjina misungo ili gumi.

³Mubambile lumbo butshwa, lidzani misungo iyeyo nge bunyambi umbila pezhugwi.

⁴Ngoti dama la Yahwe lakatambunuka, ne nshingo wabo wose unothamiwa nge kugalikabgwe.

⁵Yahwe banoda ndulamo ne ndulamiso, shango izhele ludo gwabo gusingazunguzike.

⁶Kudzimu kwakathamiwa nge dama la Yahwe, ne zwinjinji zwinowang'wako zwakathamiwa nge mafemo e nlomo wabo.

⁷Bakakubunganya vula dze gungwa se dzimu butili, Bakabiganya vula mu ng'umba dze mbiganyilo.

⁸Shango yose ngayitje Yahwe, Bagali bose be shango ngababalumbidze!

⁹Ngoti bakalebeleka, ngono ikabeyapo, bakalaula kukashingikala.

¹⁰Yahwe banothama ndangano dze tjaba dzikasibe tjimwe, banopaladza ndongoloso dze bathu.

¹¹Ndongoloso ya Yahwe imili nge kusingapele, mazwimisilo abo anoyenda nge zwizekugwana zose.

¹²Kwakakombolegwa itjaba tjina Yahwe bali Ndzimu watjo, bali bathu babashalula kube thaka yabo!

¹³Yahwe banolinga pasi bali kudzimu, banobona bathu bose.

¹⁴Kudwa kwabagele mu tjigalo tje bushe banolinga bagali be shango bose.

¹⁵Ndibo banobumba mimoyo yabo bose, banoziba mishingo yabo yose.

¹⁶Mambo aatotjidziwa nge babhayani babe banjinji, mbhayani aatotjidziwa nge masimba awe makulu.

¹⁷Mbizi ye ngwa ate tjimwe tjinga gagwabgwe kukunda, nge masimba ayo makulu ayingatjidze.

¹⁸Bonani, Yahwe banotjengeta ibabo banobatja, ibabo banogalabgwe mu ludo gwabo gusingazunguzike,

¹⁹kuti basunungule meya yabo mu lufu, ne kubatjidza mu bhamba.

²⁰Meya yedu yakalingilila kuna Yahwe, ndibo bhatsho yedu ne tjivikili tjedu.

²¹Ee, mimoyo yedu inoshathisiwa ndibo, ngoti togalabgwe mu zina labo lakayengemala.

²²Ludo gwenyu gusingazunguzike, Yahwe, ngagube naswi, koga sekwatinogalabgwe mu muli.