Read Kalanga Njimbo 34 Bible Online

Njimbo 34 - Kalanga bible

Njimbo 34

¹Ndowokudza Yahwe misi yose; kubakudza kowodwilila kuli mu nlomo wangu.

²Meya yangu inozwikudza muna Yahwe, banodziyidzika ngabahwe bashathe.

³Kudzani Yahwe nami, ngatikudzeni zina labo tose.

⁴Ndakashaka Yahwe, bakandidabila, ngono bakandisunungula mu kutja kwangu kose

⁵Lingani ku bali mupenye, ndizo musibhakhwe nge shoni.

⁶Iwoyu nthu usina bhatsho wakadana, ngono Yahwe bakanhwa, bakan'dusa muna zose zwinondziyidza.

⁷Ntumwa wa Yahwe unobakilila ibabo banobatja, ngono ukabaangula.

⁸Labilani mubone kuti Yahwe bakalulwama! Kwakashatha ibabo banotizhila mubali.

⁹Kudzani Yahwe imwi bayengemali babo, ngoti ibabo banobakudza abana tjabanosheta.

¹⁰Shumbana dzoti dzikasheta ngono dzikabhakhwa nge zhala. Koga ibabo banoshaka Yahwe abana tjimwe tjakalulwama tjabanosheta.

¹¹Izhani bakololo munditeedze, ndowomudiya kutja Yahwe.

¹²Ndiwupi nthu unoda butjilo, eyemula kutjila mazhuba manjinji, kuti aje zwinozipa?

¹³Tjengeta lulimi gugo mu kuleba zwakabipa, ne milomo iyo mu kuleba manyepkhwa.

¹⁴Bhuda mu bubi, uthame ndulamo, shaka kunyalala ukusale shule.

¹⁵Yahwe banotjengeta balulwami, ne zebe dzoteedza tjililo tjabo.

¹⁶Buso gwa Yahwe gwakasunganila bashingi be bubi, kudusa njalakang'wa nge kwabo mu shango.

¹⁷Ha balulwami belila beshaka bhatsho, Yahwe banobahwa bakabasunungula muna zose zwinobadziyidza.

¹⁸Yahwe bapejo ne bakanyalamoyo, banotjidza ibabo bakapelegwa nge kugalamoyo.

¹⁹Kudziyidzika kwe nlulwami kunjinji, koga Yahwe banonsunungula mu kuli kose.

²⁰Banotjengeta mafupa awe wose, akuna ne ling'ompela lingavunika.

²¹Bubi gowobulaya babi, na ibabo banobenga balulwami banowolashiwa.

²²Yahwe banodzutunula butjilo gwe balanda babo; akuna waibabo banotizhila mubali unowolashiwa.