Read Kalanga Njimbo 35 Bible Online

Njimbo 35 - Kalanga bible

Njimbo 35

¹Yahwe, nyanyayidzanani na ibabo banonyanyayidzana nami, igwani na ibabo banogwa nami!

²Tolani tjivikili ne thumo, mundimile!

³Dusani thumo ne nsebe mubhayane ne batatamili bangu! Muti ku meya yangu, “Ndimi sununguko iyo!”

⁴Ngababhatisiwe shoni balengudziwe ibabo banoshaka kundibulaya. Ngabashandusiwe bakawumana ibabo banolangana mbipo nge kwangu.

⁵Ngabange bunye pana phepo, Ntumwa wa Yahwe ngaabatutudzile mbeli.

⁶Zila yabo ngayibe zhalima itedzemuke ntumwa wa Yahwe akatatana nabo.

⁷Bakanditeya nge gwanga gwabo ndisina nlandu, bakanditshila bhuzhu ndisina nlandu.

⁸Kulobesiwa ngakubawile batjakazwikangwang'wa. Gwanga gwabakateya ngagubhate ibo, ngabawile muguli balobesiwe.

⁹Ipapo meya yangu inowoshatha muna Yahwe, ishatha mu jidzo labo.

¹⁰Mafupa angu wose anowoti, “Yahwe, apa ndiyani unonga imwi kene? Imwi munotjidza ibabo basina matatabuko muna ibabo bakabasimila. Motjidza basina matatabuko ne basheti muna ibabo banobatolela.”

¹¹Batendeki babiibi banomilika, banondibhuzwa zwithu zwandisingazibe.

¹²Banondilipila ndulamo nge mbipo, be siya meya yangu ili mu kudziyidzika.

¹³Koga imi ndakati begwala aambala jila le saka, azwidziyidza nge kuzwinyima zojiwa. Ndakatembezela ndakakotamisila nsholo pa ifuba tjangu,

¹⁴se ndinohwilazogwadza nzwalani kene mwana wa tate. Ndakanga nthu unolilila mmeyabe, ndakakotama ndilila.

¹⁵Koga ndakati ndikuthiwa bakakubungana ngoshatha, bakakubungana bebhayana nami, zwilema zwandakabe ndisingazibe zwikaleba bubi nge kwangu zwisingamise.

¹⁶Bakandidadila bakandikuwelela, bakandinyenamila nge lubengo.

¹⁷Kowobe lini Yahwe makalingilila koga? Mundigwile mu kundigwisa kwabo, angulani butjilo gwangu mu shumba.

¹⁸Ndizo ndowomuboka mu gubungano gulu, mu gubungano lakasima ndowomukudza.

¹⁹Musiletje zwita zwangu zwinondibenga, zwikashathila kudziyidzika kwangu, kakale musiletje ibabo banondibengela suli bakatsika zhisho nge kushatha.

²⁰Ngobe abatoleba mbakiso, koga banolukila bagedzikane mu shango matama e kutjebela.

²¹Banondiashamisila milomo yabo kwazo, beti “Ehe, Ehe, mesho edu atjibona tjashingikala.”

²²Yahwe, makubona, musinyalale. She, musi be kule nami.

²³Muzwizunguze mumile fanilo yangu, mundimile Ndzimu wangu She wangu!

²⁴Lakidzani kuti andina nlandu kuyendidzana nge ndulamo yenyu Yahwe Ndzimu wangu, musibaletje bakandidadila.

²⁵Musibaletje bakazwidwa bakati, “Ehe, yemula dze mimoyo yedu dzashingikala.” Musibaletje bakati, “Tapedza naye!”

²⁶Thamani kuti bose banoshathila kudziyidzika kwangu babhakhwe nge shoni bahwumane balengudzike. Thamani kuti shoni dzitshe banozwikudza pezhugwi kwangu.

²⁷Banoshathila kutambunuka kwangu ngabamimile nge kushatha, ngono bapaphe bati, “Yahwe bankulu, ibo banoshathila mamuko akanaka e nlanda wabo.”

²⁸Ipapo lulimi gwangu gowoleba ngekwe ndulamo yenyu nenge kukudziwa kwenyu zhuba lose.